Qytaıdyń memleket jáne qoǵam qaıratkeri Botaı Kópenuly dúnıeden ozdy

Qytaıdyń Shyńjań ólkelik Óndiristik-qurylys korpýsy qolbasshysynyń burynǵy orynbasary, Qytaıdaǵy qazaqtar arasynan shyqqan belgili memleket jáne qoǵam qaıratkeri Botaı Kópenuly ómirden ozdy. Kazinform bul týraly thepaper.cn saıtyna silteme jasap habarlaıdy. 

Qytaılyq BAQ-tyń habarlaýynsha, Qytaı kommýnıstik partııa komıtetiniń burynǵy turaqty múshesi, Shyńjań Óndiristik-qurylys korpýsy qolbasshysynyń orynbasary  85 jasynda Úrimji qalasynda baqılyq bolǵan. 

Aıta keteıik, Botaı Kópenuly 1938 jyly jeltoqsanda qazirgi Shyńjań-Uıǵyr avtonomııalyq ólkesi, Barkól qazaq avtonomııaly aýdanynda dúnıege kelgen. 1965 jyldan bastap jumys istep, 2004 jyldyń maýsym aıynda zeınetke shyqqan. 

B. Kópenuly Qytaı Ǵylym akademııasynyń Shyńjań fılıalynda jumys istep júrip, Altyn taýlarynyń tabıǵı qorǵalýy men damýynyń ǵylymı negizin quraıtyn keshendi ekspedıtsııa uıymdastyrdy, birqatar ǵylymı eńbek jazyp, «Hımııalyq sózdiktiń» qazaqsha nusqasyn qurastyrdy. 

Ol – Shyńjańdaǵy qazaq mádenıet qoǵamyn qurýǵa atsalysqan tulǵalardyń biri. Sondaı-aq Shyńjańdaǵy Shyhyzy ýnıversıtetin qurýǵa muryndyq bolǵan.