Qytaıdyń Іle óńirinde aspaly kópir úzilip, 5 adam kóz jumdy

ASTANA. KAZINFORM – Qytaıdyń Іle qazaq avtonomııalyq oblysyna qarasty Mońǵolkúre aýdanynda aspaly kópir úzilip, 5 adam qaza boldy. Bul týraly The Paper aqparattyq portaly habarlady.

Aqparat quralynyń jazýynsha, qaıǵyly oqıǵa 6 tamyz kúni saǵat 16 shamasynda bolǵan. Shaty týrıstik aımaǵynyń aýmaǵyndaǵy aspaly kópirdiń qos arqanynyń biri úzilip, kópir beti bir baýyryna qaraı qısaıyp qalǵan. Saldarynan 29 adam kópirden ózen arnasyna qulaǵan. 5 adam oqıǵa ornynda qaza bolyp, 22 adam jeńil jaralanǵan, taǵy 2 adamnyń jaǵdaıy aýyr dep baǵalanyp otyr. 

Jergilikti ákimdiktiń habarlaýynsha, jaraly jandardyń barlyǵy aýrýhanaǵa jetkizilip, em qabyldap jatyr. Olardyń ómirine qaýip tónip turǵan joq.

Іle oblysy men Mońǵolkúre aýdanynyń bıligi shuǵyl shara qoldanyp, oqıǵa ornyna qutqarýshylar men medıtsınalyq qyzmetkerlerdi tizgin ushymen jibergen. Zardap shekkenderge kómek kórsetilip, týrısterge túsindirý jumystary júrgizilgen. 

Oqıǵadan keıin Shaty týrıstik aımaǵy ýaqytsha jabyldy. Apattyń sebebi anyqtalyp jatyr. 
Ashyq derekkózden belgili bolǵandaı, Shaty týrıstik aımaǵy Іle qazaq avtonomııalyq oblysynyń Mońǵolkúre aýdanyndaǵy Shaty qyrǵyz ulttyq aýylynyń aýmaǵynda. Jer aýdany 65 sharshy shaqyrym. Tıanshan taýyn kókteı ótetin ejelgi kósh jolymen búkil Qytaıǵa belgili.

Buǵan deıin Qytaıdyń tabıǵı apattan zardap shekken aımaqtarǵa kómek kórsetý úshin 1,015 mıllıard ıýan bólgenin habarlaǵan edik.