Qytaıdyń Haınan provıntsııasynda taıfýnǵa baılanysty tótenshe jaǵdaı rejımi engizildi

ASTANA. KAZINFORM – Qytaıdyń ońtústiginde ornalasqan Haınan araldyq provıntsııasynda jeksenbi kúni tańerteń 8:00-de tórtinshi deńgeıli tótenshe jaǵdaıǵa den qoıý mehanızmi iske qosyldy. Bul 2025 jylǵy 16-shy taıfýn – «Tapanyń» qalyptasýy men jaqyndaýyna baılanysty qabyldandy, dep habarlaıdy Sınhýa.

Provıntsııanyń meteorologııalyq qyzmetiniń málimetinshe, jeksenbi kúni tańǵy 7:00-de «Tapa» Ońtústik-Qytaı teńizinde, Gýandýn provıntsııasynyń Maomın qalasyna qarasty Dıanbaı aýdanynan ońtústik-shyǵysqa qaraı 445 shaqyrym qashyqtyqta tirkeldi. Onyń ortalyǵyna jaqyn mańdaǵy jeldiń ekpini sekýndyna 23 metrge deıin jetken.

Sınoptıkterdiń boljamynsha, taıfýn kúsheıe túsip, soltústik-batysqa qaraı saǵatyna 10-15 shaqyrym jyldamdyqpen qozǵalady.

Dúısenbi kúni tańerteńnen túske deıin Gýandýn provıntsııasyndaǵy Chjýhaı jáne Chjantszıan qalalarynyń jaǵalaýyna soqqy berýi múmkin.

Jeksenbi kúni kúndiz daýyl Tsıýnchjoý buǵazy men Beıbývan shyǵanaǵyna shyǵystan soqqan qatty jel ákelmek. Jeldiń kúshi - 5, keı jerlerde 7-8 balǵa deıin jetedi.

Haınan aralynyń shyǵys jaǵalaýynda jeldiń ekpini 7-9, tipti 10-11 balǵa deıin kúsheıedi dep kútilýde.

Sısha men Chjýnsha araldarynyń akvatorııasynda ol 6-8, keıde 8-10 balǵa deıin barady.

Aıta keteıik, Qytaıda tótenshe jaǵdaılarǵa den qoıýdyń tórt deńgeıli júıesi bar. Onyń ishinde birinshi deńgeı – eń joǵary ári eń qaýipti sanalady.

Eske salaıyq, Taılandta «Kadzıkı» taıfýnynan bes adam qaza tapty.