Qytaıdyń Haınan provıntsııasynan «Kadzıkı» taıfýnyna baılanysty 20 myń adam kóshirildi

ASTANA. KAZINFORM – Bıyl 13-shi bolyp otyrǵan «Kadzıkı» taıfýny jeksenbi kúni Qytaıdyń aral provıntsııasy Haınannyń ońtústik jaǵalaýyna jaqyn aımaqta kúsheıe túsip, sýpertaıfýn deńgeıine jetti, dep habarlaıdy Kazinform menshikti tilshisi Sınhýa agenttigine silteme jasap.

Haınan provıntsııasy meteorologııalyq stantsııasynyń málimetterine qaraǵanda, sýpertaıfýn Vetnamnyń soltústik jáne ortalyq jaǵalaýyna bet alǵan.

Taıfýn shamamen saǵatyna 20 shaqyrym jyldamdyqpen qozǵalady. Jeksenbi kúni daýyl ortalyǵyna jaqyn aımaqta jeldiń jyldamdyǵy Bofort shkalasy boıynsha 14 balǵa (45 m/s) jetti.

Qytaıdyń Haınan provıntsııasynda 20 myńnan astam adam evakýatsııalandy, 30 myńnan asa balyq aýlaý kemesi porttarǵa oraldy nemese qaýipsiz jerlerge jasyryndy.

Sanıa qalasynda mektep sabaqtary toqtatyldy, kásiporyndar men saýda oryndarynyń jumysy, qoǵamdyq kólik qozǵalysy jáne keme qatynasy ýaqytsha toqtatyldy.

Vetnamnyń ortalyq provıntsııalarynda bılik barlyq teńiz kólikterine teńizge shyǵýǵa tyıym saldy.

Vetnam BAQ-ynyń habarlaýynsha, «Kadzıkı» taıfýny 25 tamyzda eldiń ortalyq jaǵalaýyna jaqyndaǵanda 11–12 balǵa deıin kúsheıip, ekpini 15 balǵa deıin (167–183 km/saǵ) jetýi múmkin.

Osyǵan deıin Vetnamda «Kadzıkı» taıfýnyna baılanysty shuǵyl sharalar qolǵa alynǵany týraly jazdyq.