Qytaıdyń gýmanoıd robottary Ortalyq Azııa naryǵyna bet aldy

ASTANA. KAZINFORM – Qytaıdyń antropomorfty robottar óndirýshisi Galbot Ortalyq Azııa elderimen yntymaqtastyq ornatyp, jasandy ıntellekt júıelerin ekonomıkanyń naqty sektoryna jáne densaýlyq saqtaý salasyna engizýdi josparlap otyr. Bul týraly Renmin Huabao habarlaıdy.

Kompanııanyń strategııalyq damý jónindegi dırektory Chjao ıÝılıdiń aıtýynsha, Galbot Qytaıda jınaqtalǵan robototehnıka engizý tájirıbesin paıdalanyp, Ortalyq Azııa aımaǵynda áriptestik aıasyn keńeıtýdi kózdeıdi. Qazirgi ýaqytta kompanııa ónerkásip sektoryna robot jetkizý boıynsha sheteldik tapsyrystar alyp otyr.

– Ónerkásip, kommertsııalyq sala jáne densaýlyq saqtaý baǵyttaryndaǵy sheshimderimiz keń kólemde praktıkalyq qoldanys kezeńine ótti, – dedi ol.

Qytaıda Galbot «aqyldy dárihanalar» jelisin iske qosqan. Munda gýmanoıd robottar túngi aýysymda farmatsevt qyzmetin atqarady. Kompanııa ókili Ý Ventao avtomattandyrý onlaın tapsyrystardy táýlik boıy kidirissiz óńdeýge múmkindik beretinin jáne personalǵa túsetin júktemeni azaıtatynyn atap ótti.

Sondaı-aq adamǵa uqsas robottardy medıtsınalyq mekemelerge engizý josparlanyp otyr. Onda olar patsıentterden bastapqy saýalnama alyp, sımptomdardy taldap, keıin dárigerge baǵyttaıdy.

Kompanııa basshylyǵynyń málimdeýinshe, Galbot-tyń basty artyqshylyǵy – sıntetıkalyq modeldeý nátıjesinde jınalǵan ondaǵan mıllıard derek birligin qamtıtyn jeke derekter bazasyna negizdelgen. Qytaılyq ázirleýshi Sim-to-Real ádisin qoldanady, bul oqytý algorıtmderin vırtýaldy ortadan naqty jaǵdaılarǵa kóshirýge múmkindik beredi. Sonyń arqasynda embodied jasandy ıntellektiniń álemdegi eń iri modeli jasalǵan.

Buǵan deıin Qytaıda robottardyń basqa robottarǵa arnalǵan bólshekterdi óndire bastaǵany týraly habarlanǵan edi.