Qytaıdyń Geely jáne GAC avtomobılderi Reseı naryǵynan ketýi múmkin

ASTANA. KAZINFORM — Geely jáne GAC qytaılyq brendteri 2026 jyldyń birinshi jartysynda Reseıdegi óndirisin qolǵa almaıtyn bolsa, el naryǵynan ketýi múmkin. Bul týraly «Rolf» kompanııasynyń bas dırektory Svetlana Vınogradova jýrnalısterge aıtty, dep habarlaıdy TASS.

Avtodılerdiń boljamynsha, kelesi jyly Reseı naryǵynda eki-úsh jańa qytaılyq avtokólik brendi paıda bolýy múmkin. Sonymen qatar osyndaı mólsherde brendterdiń ketýi de yqtımal.

«Basty másele — Geely jáne GAC lokalızatsııasy. Olarda naryqtyń aıtarlyqtaı úlesi bar, bul brendter reseılikter arasynda suranysqa ıe. Eger 2026 jyldyń birinshi jartysynda kólik qurastyrýǵa kirispese, bul brendterdiń Reseı naryǵynan ketýin joqqa shyǵarmaımyz», delingen avtodılerdiń tanystyrylymynda.

Vınogradovanyń tanystyrylymynda atap ótilgendeı, kelesi jyly Reseıde jańa jeńil avtomobılderdiń parallel ımport úlesi 4%-ǵa deıin tómendeýi múmkin. Basty sebep — mundaı jetkizilimderdiń 80–85%-yn qamtıtyn Qytaıdyń eksporttyq shekteýleri.

Óz kezeginde GAC avtobrendiniń baspasóz qyzmeti qytaılyq kompanııanyń Reseı naryǵynan ketýdi josparlamaıtynyn jáne óz qatysýyn keńeıtý boıynsha jumysyn jalǵastyryp jatqanyn habarlady.

«Reseı naryǵy GAC brendi úshin ǵalamdyq damý turǵysynan strategııalyq mańyzǵa ıe. Uzaq merzimdi strategııa ózgerissiz qalady», delingen kompanııa habarlamasynda.

Qytaılyq avtobrend ókilderi GAC-tyń qalypty rejımde jumys istep jatqanyn jáne barlyq aǵymdaǵy mindettemelerin oryndaýdy rastady. Kompanııa óz pozıtsııasyn nyǵaıtý boıynsha josparly jumys júrgizip, dılerlik jelisi men servıs ınfraqurylymyn damytyp jatyr.

Eske sala ketsek, buǵan deıin elimizdegi avtokólik naryǵyndaǵy baǵalar men boljamdar týraly jazǵanbyz. 

Al Ónerkásip jáne qurylys mınıstrligi Ónerkásip komıtetiniń tóraǵasy Azamat Panbaev Úkimet otyrysynan keıin ótken baspasóz máslıhatynda avtolızıng qazaqstandyqtarǵa nesimen tıimdi bolatynyn aıtty.