Qytaıdyń ǵarysh apparaty juldyzaralyq obektini alǵash ret jaqynnan baqylady

ASTANA. KAZINFORM — 2022 jyldyń 1 qańtarynda Qytaı ulttyq ǵarysh basqarmasy (CNSA) jarııalaǵan fotoda «Tıanven-1» orbıtalyq apparaty men Mars beınelengen, dep jazdy Sınhýa agenttigi.

Marsty zertteýge arnalǵan Qytaıdyń «Tıanven-1» mıssııasynyń orbıtalyq apparaty joǵary aıqyndy kamerasynyń kómegimen 3I/ATLAS dep belgilengen juldyzaralyq nysandy sátti baqylap shyqty. Bul týraly Qytaı ulttyq ǵarysh basqarmasy (CNSA) málimdegen.

Baqylaý kezinde ǵarysh apparaty 3I/ATLAS-tan shamamen 30 mıllıon kılometr qashyqtyqta ornalasqan. Osylaısha ol atalǵan juldyzaralyq nysandy baqylaı alǵan eń jaqyn zondtardyń biri boldy.

Jerdegi taldaý júıesi óńdep shyǵarǵan málimetterden kometanyń aıqyn erekshelikteri kórinis tapty. Zertteýshiler 30 sekýnd ishinde túsirilgen birqatar sýretterden anımatsııa jasap, juldyzaralyq keńistiktegi nysannyń qozǵalysyn kórsetti. Bul baqylaýlar endi 3I/ATLAS nysanyn ári qaraı ǵylymı turǵydan zertteýge paıdalanylmaq.

Osy sátti baqylaý — «Tıanven-1» apparatynyń keńeıtilgen mıssııasy aıasyndaǵy mańyzdy jetistik bolyp sanalady. Mundaı álsiz jaryq shyǵaratyn aspan nysanyn anyqtaý — Qytaıdyń «Tıanven-2» mıssııasy úshin qundy tehnıkalyq synaq boldy. «Tıanven-2» 2025 jyldyń mamyr aıynda ushyrylyp, Jerge jaqyn asteroıdtan úlgi jınap, basty beldeýdegi kometany zertteýdi maqsat etken, dep habarlady CNSA.

Aıta keteıik, buǵan deıin Qytaı ǵarysh stantsııasynda «Shenchjoý-21» basqarylatyn ǵarysh kemesimen jetkizilgen ystyq aýa peshi alǵash ret iske qosylǵan bolatyn. Onda qytaı ǵaryshkerleri ǵaryshta jańa daıyndalǵan taýyq qanattary men steıkti dám tatyp jatqan sátter kórsetilgen.