Qytaıdyń Gansý provıntsııasynda tasqynnan qaza tapqandar sany 15 adamǵa jetti

ASTANA. KAZINFORM — Qytaıdyń soltústik-batysyndaǵy Gansý provıntsııasynda bolǵan taý tasqyny saldarynan 15 adam qaza taýyp, taǵy 28 adam iz-túzsiz joǵalǵan, dep habarlaıdy Sınhýa.

Bul týraly seısenbi kúni provıntsııanyń Tótenshe jaǵdaılardy basqarý departamenti habarlady.

8 tamyz kúni tańerteńgi jaǵdaı boıynsha, ıÝıchjýn ýezinde (Gansý provıntsııasy) tótenshe jaǵdaı jarııalanyp, izdestirý-qutqarý jumystary jalǵasyp jatyr.

7 tamyz keshinen 8 tamyz tańyna deıin Gansý provıntsııasynyń ákimshilik ortalyǵy — Lanchjoý qalasy men onyń mańyndaǵy ıÝıchjýn ýezinde tolassyz nóser jaýyn jaýyp, taý kóshkinderi men laı tasqyndaryna sebep boldy.

Qazirgi ýaqytta jergilikti bılik ıÝıchjýn ýezinde tabıǵı apattyń aýqymyn jáne keltirilgen shyǵyndy baǵalaý jumystaryn júrgizip jatyr.

Osyǵan deıin habarlanǵandaı, Gansý provıntsııasynda taý tasqyny saldarynan 10 adam qaza taýyp, 33 adam iz-túzsiz joǵalyp ketkenin jazǵan edik.

Qytaı úkimeti sý tasqynynan zardap shekken aımaqtardaǵy joldardy shuǵyl qalpyna keltirý jumystaryna ortalyq úkimet bıýdjetinen 70 mıllıon ıýan (shamamen 9,81 mıllıon AQSh dollary) bólgenin málim etti.

Sonymen qatar ıÝıchjýn ýezinde jeksenbi kúni taý tasqyny saldarynan zaqymdanǵan joldar men elektr jelileri jóndelgeni habarlandy.