Qytaıdyń Gansý provıntsııasynda 5,5 magnıtýdaly jer silkinisi boldy

ASTANA. KAZINFORM — Seısenbi kúni Qytaıdyń Gansý provıntsııasyndaǵy Gannan-Tıbet avtonomdy aımaǵynyń Tevo aýdanynda 5,5 magnıtýdaly jer silkinisi tirkeldi. Bul týraly Qytaıdyń seısmologııalyq jeliler ortalyǵy (CENC) habarlady, dep jazady Sınhýa.

Qutqarýshylar men jergilikti bılik ókilderiniń aıtýynsha, jer silkinisinen qurban bolǵandar men zardap shekkender týraly aqparat túsken joq. Alaıda jer asty dúmpýleriniń áserinen keıbir ǵımarattarda jaryqtar paıda bolǵany týraly aıtyldy. Qazirgi ýaqytta aımaqta tótenshe jaǵdaıǵa qarsy 3-shi deńgeıli jedel áreket etý rejımi iske qosyldy.

Tevo aýdanynda adamdardy qaýipsiz aımaqtarǵa evakýatsııalaý jumystary júrgizilýip jatyr. Sondaı-aq, jer silkinisinen kelgen shyǵyndy baǵalaý jumystary bastaldy. Aldyn ala málimetter boıynsha, jer asty dúmpýleri epıtsentrge jaqyn aýdandarda qatty sezilgen, biraq elektrmen jabdyqtaý, baılanys jáne sý jetkizý qalypty jaǵdaıda jumys isteýp tur.

Jergilikti turǵyndardyń aıtýynsha, seısmıkalyq belsendilik óte kúshti bolǵandyqtan, adamdar óz úılerin tastap, ashyq jerlerge qaýipsiz oryndarǵa júgirgen. Ǵımarattarda eleýli qurylymdyq zaqymdar anyqtalǵan joq.

Jer silkinisinen keıin Gannan-Tıbet avtonomdy aımaǵynan 20 tehnıka men 120 órt-qutqarý qyzmetkeri mobılızatsııalandy. Sonymen qatar, Lanchjoý qalasynan 24 tehnıka, 120 órt sóndirýshi jáne úsh izdestirý ıtinen turatyn qosymsha kúshter jiberildi. Lanchjoý — Gansý provıntsııasynyń ákimshilik ortalyǵy. Sondaı-aq, kórshiles Lınsıa-Hýeı avtonomdy okrýginen 10 tehnıka, 60 órt sóndirýshi jáne eki izdestirý ıti kómek kórsetip jatyr.

CENC derekteri boıynsha jer silkinisiniń epıtsentri 34,06 gradýs soltústik endigi men 103,25 gradýs shyǵys boılyǵy boıynsha ornalasqan, al jer asty dúmpýleri 10 km tereńdikte tirkelgen. 

Osyǵan deıin Qyrǵyzstannyń ońtústiginde 3 balldyq jer silkinisi bolǵany habarlandy.