Qytaıdyń dástúrli farfor óndirisi ıÝNESKO-nyń Búkilálemdik muralar tizimine endi
ASTANA. KAZINFORM — BUU-nyń Bilim, ǵylym jáne mádenıet máseleleri jónindegi uıymy (ıÝNESKO) Ońtústik Koreıanyń Pýsan qalasynda ótip jatqan Búkilálemdik mura komıtetiniń 48-sessııasynda Qytaıdyń Tszındechjen qalasyndaǵy dástúrli farfor óndirisine qatysty mura nysandaryn Búkilálemdik muralar tizimine engizdi. Bul týraly Sınhýa agenttigi jazdy.
Osylaısha, Qytaıdaǵy ıÝNESKO-nyń Búkilálemdik muralar tizimine engen nysandardyń jalpy sany 61-ge jetti.
Tszındechjendegi dástúrli farfor óndirisi muralary — Qytaıdyń Tszıansı provıntsııasyndaǵy (Shyǵys Qytaı) Tszındechjen qalasynda X ǵasyrdan XIX ǵasyrǵa deıin qalyptasyp, damyǵan qolónerlik farfor óndirisiniń tutas júıesin beıneleıtin tarıhı nysandar kesheni.
ıÝNESKO qabyldaǵan sheshimde Tszındechjende álemdegi eń sapaly farfor óndirilgeni atap ótilgen. Ásirese kók-aq tústi farfor buıymdary men olardyń órnekteri dúnıejúzine keńinen taralyp, Qytaı mádenıeti men óneriniń sımvolyna aınalǵan.
Tizimge engizilgen nysandar qatarynda qalalyq farfor óndirisi ortalyǵy, ejelgi Hýtıan peshter kesheni, Gaolın farfor sazynyń ken orny, Chanlın farfor tasynyń ken orny jáne Tszıaotan aýmaǵyndaǵy otyn daıyndaý aımaǵy bar. Bul nysandardyń jalpy aýmaǵy 19,79 sharshy shaqyrymdy, al býferlik aımaǵy 55,46 sharshy shaqyrymdy quraıdy.
Búkilálemdik mura komıtetiniń málimetinshe, bul nysan Qytaıdyń dástúrli farfor jasaý tehnologııasynyń, farfor óneri men óndirisiniń jańashyl damýyn aıqyn kórsetedi. Sondaı-aq ol qytaılyq farfor óndirisiniń álemdik keramıka ónerkásibiniń damýyna, órkenıetter arasyndaǵy tájirıbe almasý men mádenı yqpaldastyqqa zor yqpal etkenin dáleldeıdi.
Komıtet Qytaı úkimetiniń atalǵan Búkilálemdik mura nysanyn qorǵaý jáne tıimdi basqarý baǵytyndaǵy kúsh-jigeri men jetistikterine joǵary baǵa berdi.
Búkilálemdik mura komıtetiniń sessııasynda Qytaı úkimeti atynan sóz sóılegen Qytaıdyń Mádenıet jáne týrızm vıtse-mınıstri, Memlekettik mádenı murany qorǵaý basqarmasynyń basshysy Chjao Tsıýan eldiń Búkilálemdik mádenı jáne tabıǵı murany qorǵaý týraly konventsııa talaptaryn tolyq oryndaýǵa beıildi ekenin málimdedi.
Ol Qytaıdyń mádenı mura nysandaryn qorǵaý, saqtaý jáne ornyqty paıdalaný júıesin odan ári jetildirip, ıÝNESKO-men jáne Konventsııaǵa qatysýshy ózge memlekettermen adamzattyń ortaq murasyn saqtaý baǵytyndaǵy yntymaqtastyqty jalǵastyratynyn atap ótti.
Eske sala keteıik, jaqynda Mańǵystaýdyń jartasty meshitteri ıÝNESKO-nyń Dúnıejúzilik muralar tizimine enetini belgili boldy.
