Qytaıdyń Chýntsın qalasynda taý betkeıi qulap, 30-dan astam adamdy izdestirip jatyr
ASTANA. KAZINFORM — Qytaıdyń Chýntsın qalasyna qarasty Penshýı ýezinde 17 shilde kúni tústen buryn taý betkeıi opyrylyp, saldarynan biraz turǵyn úı topyraq astynda qaldy. Bul týraly Lianhe Zaobao basylymy habarlady.
Basylymnyń jazýynsha oqıǵa jergilikti ýaqyt boıynsha saǵat 9:10 shamasynda Ýtszıan ózenindegi Úshinshi kópir mańynda bolǵan.
Derekkózdiń málimetinshe, tańǵy saǵat 8:00 shamasynda jergilikti qyzmetkerler taý betkeıinen usaq tastardyń syrǵı bastaǵanyn baıqap, dabyl júıesin iske qosqan. Nátıjesinde 60-tan astam turǵyn qaýipsiz jerge kóshirilgen. Alaıda evakýatsııa kezinde taý betkeıi kenet opyrylyp, kóptegen adam úıindi astynda qalyp qoıǵan.
Basylymnyń jazýynsha, qas qaraıǵanǵa deıin qutqarýshylar úıindi astynan 18 adamdy shyǵarǵan. Sońǵy málimet boıynsha, 8 adam qaza taýyp, 34 adam iz-túzsiz joǵalǵan.
Apat aımaǵynyń mańynan 1100-den astam adam evakýatsııalandy.
Kýágerlerdiń aıtýynsha, taý betkeıi ne bári bir-eki mınýttyń ishinde opyrylyp túsken. Oqıǵa kezinde jarylysqa uqsas qatty dybys estilip, iri tastar taý bókterinen etekke qaraı domalaǵan.
Basylymnyń jazýynsha, apat bolǵan aýmaqta negizinen keramıka jáne qurylys materıaldary saýdasymen aınalysatyn jeke kásipkerler turǵan.
Áleýmettik jelide tarap ketken beınejazbalarda taý betkeıi jappaı syrǵyp, alyp tastardyń joldy tolyq jaýyp qalǵany kórinedi.
Qutqarý jumysyna 800-den astam maman jumyldyryldy. Chýntsın qalalyq Tótenshe jaǵdaımen kúres jasaǵynyń basshysy Van Pınniń aıtýynsha, taý betkeıi áli de turaqsyz. Osyǵan baılanysty apat ornynda táýlik boıy baqylaý júrgizetin radıolokatsııalyq baqylaý júıesi ornatylǵan.
Basylymnyń málimetinshe, Qytaıdyń Tabıǵat apattarynyń aldyn alý jáne apat saldaryn joıý jónindegi memlekettik komıteti IV deńgeıdegi tótenshe áreket etý rejımin iske qosty.
Sınhaý agenttiginiń habarlaýynsha, oqıǵadan keıin Qytaı Halyq Respýblıkasynyń tóraǵasy Sı Tszınpın qutqarý jumystaryn ǵylymı negizde uıymdastyrý, qaıtalama apattardyń aldyn alý, zardap shekkenderge járdem berý jáne oqıǵanyń saldaryn joıý jumystaryn tıimdi júrgizý jóninde tapsyrma berdi.
Sonymen qatar ol apat sebebin jan-jaqty anyqtap, osy sekildi geologııalyq qaýipterdiń aldyn alý úshin el boıynsha tekserý júrgizýdi talap etti. Sı Tszınpın barlyq óńirler men jaýapty memlekettik organdarǵa qaýipsizdik talaptaryn kúsheıtip, qaýipti ýchaskelerge turaqty monıtorıng júrgizý jumysyn jandandyr jóninde tapsyrma berdi.
Buǵan deıin Qytaıda Jerdegi eń kóne ıantar tabylǵany týraly habarlaǵan bolatynbyz.
