Qytaıdyń burynǵy sport mınıstri sybaılas jemqorlyq úshin ólim jazasyna kesildi
ASTANA. KAZINFORM — Qytaıdyń burynǵy sport mınıstri Goý Chjýnven para alyp, qyzmetin asyra paıdalanǵany úshin ólim jazasyna kesildi, dep habarlaıdy China Daily.
Sot sheshiminde Goý 2009 jyldan 2024 jylǵa deıin ártúrli memlekettik laýazymdardy atqarǵany jáne óz qyzmetin agenttikter men jeke tulǵalarǵa kommertsııalyq mámileler men jobalardy maquldaýǵa kómektesý úshin paıdalanǵany aıtylǵan. Bul áreketteri úshin ol 236 mıllıon ıýan (33,4 mıllıon dollar) alǵan.
Sondaı-aq, sot ony qyzmetin asyra paıdalanǵany úshin kináli dep tapty. 2012 jáne 2013 jyldar aralyǵynda Beıjiń meriniń orynbasary qyzmetin atqaryp júrip jobalardyń birin satyp alý kezinde ókilettigin asyra paıdalanǵany rastaldy. Bul memlekettik múliktiń aıtarlyqtaı shyǵynǵa ushyraýyna sebep bolyp, memleket pen qoǵam múddesine zııan keltirdi. Bul oqıǵa úshin ol bes jylǵa bas bostandyǵynan aıyryldy.
Eki aıyptaý boıynsha úkimin qorytyndylaǵan sot ony shartty túrde ólim jazasyna kesti. Zańsyz alynǵan barlyq qarajat jáne olar boıynsha paıyzdar memlekettik qazynaǵa aýdarylady. Goý sondaı-aq ómir boıǵa saıası quqyqtarynan jáne barlyq jeke múlkinen aıyryldy.
Qytaıda sottalǵan adam eki jyldyq synaq merzimi ishinde basqa qylmys jasamasa, shartty ólim jazasy ómir boıǵy bas bostandyǵynan aıyrý jazasymen aýystyrylady. Keıin tártibine qaraı ómir boıy bas bostandyǵynan aıyrý merzimi qysqartylýy múmkin.
Alaıda, sot Goý qylmystarynyń aýyrlyǵyna jáne olardyń áleýmettik áserine baılanysty odan ári jeńildetýge nemese shartty túrde merziminen buryn bosatýǵa quqyly emes dep sheshti. Bul onyń jazasy jeńildetilgen jaǵdaıda, ol ómiriniń qalǵan bóligin túrmede ótkizetinin bildiredi.
Buǵan deıin Sıngapýr eki kúnde úsh adamdy ólim jazasyna keskenin habarlaǵan edik.