Qytaıdyń burynǵy Qorǵanys mınıstrleri ólim jazasyna kesildi
ASTANA. KAZINFORM – Qytaı soty eldiń Qorǵanys mınıstri qyzmetin atqarǵan Veı Fenhe men Lı Shanfýdy ólim jazasyna kesti, dep habarlaıdy Sınhýa agenttigi.
Aqparatqa sáıkes, 7 mamyr kúni Áskerı sot QKP Ortalyq áskerı keńestiń burynǵy múshesi, Memlekettik keńestiń burynǵy múshesi — Qorǵanys mınıstri Veı Fenheniń para alý isi boıynsha úkim shyǵardy. Sot Veı Fenheni para alǵany úshin kináli dep tanyp, ólim jazasyna kesti. Sot sheshimimen jazanyń oryndalýy eki jylǵa keıinge qaldyryldy.
Sondaı-aq ol saıası quqyǵynan ómir boıyna aıyrylyp, jeke múlki tolyǵymen tárkilendi. Eki jyldan keıin ólim jazasy oryndalmaı, zańǵa sáıkes ómir boıy bas bostandyǵynan aıyrý jazasymen almastyrylǵan jaǵdaıda, ol ómiriniń sońyna deıin qamalady. Jaza merzimin qysqartýǵa, merziminen buryn bosatýǵa bolmaıdy.
Sondaı-aq Áskerı sot QKP Ortalyq áskerı keńestiń burynǵy múshesi, Memlekettik keńestiń burynǵy múshesi—Qorǵanys mınıstri Lı Shanfýdyń da isin qarap, ony para alǵany úshin kináli dep tanydy. Ol ólim jazasyna kesildi, sot sheshimimen jazanyń oryndalýy eki jylǵa keıinge qaldyryldy. Aqparatqa sáıkes, eki jyldan keıin ólim jazasy oryndalmaı, zańǵa sáıkes ómir boıy bas bostandyǵynan aıyrý jazasymen almastyrylǵan jaǵdaıda, Lı Shanfý ómiriniń sońyna deıin qamaýda otyrýǵa tıis. Jaza merzimin qysqartýǵa, merziminen buryn bosatýǵa tyıym salynady.
Ashyq derekkózderden belgili bolǵandaı, 68 jastaǵy Lı Shanfý Qytaı Halyq-azattyq armııasynyń Sıchan spýtnık ortalyǵynyń qolbasshysy, Bas jabdyqtaý bólimi bastyǵynyń orynbasary, Ortalyq áskerı keńestiń Qarý-jaraqty damytý bóliminiń basshysy sekildi qyzmetterdi atqarǵan. 2022 jyllǵy Qytaı Kommýnıstik partııasynyń HH sezinen keıin Lı Shanfý Ortalyq áskerı keńestiń múshesi bolyp taǵaıyndaldy.
2023 jylǵy naýryzda ol Veı Fenheniń ornyna Memlekettik keńestiń múshesi--Qorǵanys mınıstri qyzmetine kóterildi. Degenmen sol jyly shilde aıynda Lı Shanfý saıasat alańynan izim-ǵaıym joǵaldy.
2023 jylǵy 31 tamyzda Lı Shanfýǵa «partııa tártibi men memleket zańyn óreskel buzdy» degen aıyp taǵylyp, resmı tergeý amaldary bastaldy. Kelesi aıynda onyń burynǵy basshysy, burynǵy Qorǵanys mınıstri Veı Fenheniń ústinen is qozǵalǵany belgili boldy. Bıyl 72 jastaǵy Veı Fenhe Qytaı Halyq-azattyq armııasynyń Ekinshi artıllerııalyq áskeriniń (qazirgi Zymyran kúshteri) qolbasshysy, sondaı-aq Zymyran kúshteri qolbasshysy qyzmetterin atqarǵan.
2017 jyly ótken QKP-nyń XIX sezinen keıin ol Ortalyq áskerı keńestiń múshesi, Memlekettik keńestiń múshesi-Qorǵanys mınıstri bolyp taǵaıyndalǵan edi.
2024 jylǵy 27 maýsymda Lı Shanfý men Veı Fenhe partııa qatarynan shyǵaryldy.
Buǵan deıin Qytaıdyń Qyrǵyzstanda jańa energııa kózderin damytýǵa 1 mlrd dollarǵa deıin ınvestıtsııa salýǵa daıyn ekenin habarlaǵan bolatynbyz.
