Qytaıdyń burynǵy aýyl sharýashylyǵy mınıstri ólim jazasyna kesildi
ASTANA. KAZINFORM – QHR burynǵy aýyl sharýashylyǵy jáne aýyl isteri mınıstri Tan Jentszıan asa iri kólemde para alǵany úshin ólim jazasyna kesildi. Sot úkimi eki jyldan keıin oryndalady, dep habarlaıdy Sınhýa aqparat agenttigi.
Tszılın ólkesi Chanchýn qalasynyń aralyq ortańǵy satydaǵy Halyq soty shyǵarǵan úkimge sáıkes, aýyl sharýashylyǵy jáne aýyl isteri mınıstrligi partııa tobynyń hatshysy qyzmetin de atqarǵan Tan Jentszıan ómir boıyna saıası quqyǵynan aıyryldy. Onyń barlyq jeke múlki, sondaı-aq kez kelgen zańsyz kirisi tárkilenip, memleket paıdasyna alynady.
Anyqtalǵandaı, 2007 jáne 2024 jyldar aralyǵynda ortalyq jáne jergilikti deńgeıde ártúrli laýazymdardy atqarǵan Tan Jentszıannyń qyzmettik dárejesin tıisti uıymdar men jeke tulǵalarǵa sharýashylyq qyzmet, jobalyq kelisimsharttar jasaý jáne kadrlardy aýystyrý sııaqty máselelerde kómektesý úshin asyra paıdalanǵan. Ol 268 mln ıýannan (shamamen 38 mln dollar) astam somaǵa qarjylyq nemese materıaldyq paıda kórgen.
Sot Tan Jentszıan memleket pen halyqtyń múddesine aýyr zııan keltirgen qylmysy úshin ólim jazasyna kesti. Alaıda, onyń kinásin moıyndaýy, zańsyz tabysyn qaıtarýy jáne jaýaptylyqty jeńildetetin basqa da mán-jaılardy eskere otyryp, úkimniń oryndalýyn keıinge qaldyrdy.
2020 jyldyń jeltoqsanynda Tan Jentszıan QHR Aýyl sharýashylyǵy jáne aýyldyq ister mınıstrligi QKP fılıalynyń hatshysy bolyp taǵaıyndaldy.
2024 jyldyń qarashasynda ol partııadan shyǵaryldy, al jeltoqsanda qamaýǵa alyndy.
Eske sala ketsek, ótken aptada AQSh prezıdenti Donald Tramp Vashıngtonda ólim jazasyna ruqsat berdi.
Materıaldy Kazinform úshin arnaıy Sınhýa aqparat agenttigi usyndy.