Qytaıdyń beıneplatformasy JI-ge arnalǵan akterler bazasyn iske qosyp, daý týdyrdy
ASTANA. KAZINFORM — Qytaıda jaqynda iske qosylǵan, jasandy ıntellekt negizinde jumys isteıtin kásibı kıno jáne teleóndiris platformasy shynaıy akterlerdiń kelbeti men daýysyn paıdalanatyn tsıfrlyq derekterge baılanysty qyzý pikirtalas týdyrdy. Bul týraly Kyodo agenttigi jazdy.
Qytaıdaǵy Netflix balamasy sanalatyn iQIYI Inc. kompanııasy sáýir aıynda iske qosqan Nadou Pro platformasynda qazirdiń ózinde 100-den astam tanymal akter tirkelgen. «Jasandy ıntellektige negizdelgen talanttar qory» arqyly kontent jasaýshylar akterlerdiń beınesin, daýysyn nemese qımyl-qozǵalysyn paıdalaný jóninde olarmen kelissóz júrgize alady.
Alaıda synshylardyń pikirinshe, jasandy ıntellekt jasaǵan kontent kórermenge shynaıy akterlerdiń oıyny sııaqty áser ete almaıdy.
iQIYI bul qadamǵa Qytaıdyń oıyn-saýyq ındýstrııasyndaǵy básekelestik kúsheıgen kezeńde baryp otyr. Sońǵy ýaqytta tiri akterlerdiń qatysýynsyz, tolyqtaı jasandy ıntellekt arqyly túsiriletin qysqametrajdy serıaldar keńinen tanymal bola bastady.
Qytaılyq BAQ-tyń málimetinshe, AI platformasyna 10 myńnan astam kontent jasaýshy tirkelgen. Onyń kómegimen ǵylymı fantastıka, trıller, fentezı jáne qysqametrajdy dramalar janryndaǵy 100-ge jýyq joba ázirlengen.
Platforma stsenarıı jazýdan bastap storıbord ázirleý, vızýaldy effektiler jasaý jáne sońǵy montajǵa deıingi óndiris protsesin jeńildetedi. Sondaı-aq birneshe sekýnd ishinde aýqymdy kórinisterdi jasap, dala túsirilimderi men kúrdeli dekoratsııalarǵa ketetin shyǵyndy azaıtýǵa múmkindik beredi. Budan bólek, tsıfrlyq akterlerdi de jasandy ıntellekt arqyly jasaýǵa bolady.
Sáýir aıynda Baidu Inc. kompanııasynyń qoldaýyndaǵy iQIYI bas dırektory Gýn ıÝ bolashaqta jasandy ıntellekt múlde qoldanylmaı túsirilgen kórkem fılmder «materıaldyq emes mádenı muranyń» bir túrine aınalýy múmkin ekenin aıtqan. Onyń pikirinshe, oıyn-saýyq kontentin JI kómegimen jasaý úrdisin toqtatý múmkin emes.
Ol sondaı-aq jańa tehnologııalar akterlerdiń jumys jaǵdaıyn jaqsartatynyn, óıtkeni uzaqqa sozylatyn túsirilimderdiń qajettiligin azaıtatynyn málimdedi.
Alaıda Gýn ıÝdiń bul pikiri áleýmettik jelilerde úlken synǵa ushyrady. Kóp qoldanýshy jasandy ıntellekt jasaǵan týyndylardyń sapasyna kúmán keltirdi.
Internettegi jaǵymsyz pikirlerden keıin bastapqyda jasandy ıntellektiniń talanttar bazasyna tirkelýge kelisken keıbir tanymal akterler bul bastamaǵa qatysýǵa kelisim bermegenderin málimdedi.
Aıta keteıik, Google jasandy ıntellekt tehnologııalaryn damytý úshin SpaceX kompanııasynyń esepteý qýatyn paıdalaný jóninde aýqymdy kelisim jasasty.
