Qytaıdyń «Beıdoý» navıgatsııalyq spýtnıktik júıesi orbıtada jańǵyrtylady

ASTANA. KAZINFORM – Qytaıdyń «Beıdoý» navıgatsııalyq spýtnıktik júıesi jaqyn arada orbıtada jańǵyrtylady. Bul júıeniń qyzmet kórsetý sapasyn arttyrýǵa múmkindik beredi. Bul týraly Qytaıdyń spýtnıktik navıgatsııa jónindegi basqarmasy habarlady, dep jazady Sınhýa agenttigi.

Aldaǵy jańǵyrtý protsesi birqatar spýtnıkterdiń jumys jaǵdaıyn ońtaılandyrýǵa múmkindik beredi. Qytaıdyń spýtnıktik navıgatsııa jónindegi basqarmasy orbıtadaǵy spýtnıkterdiń úılesimdi jumysyn jetildirýdi jáne olardy testileýdi turaqty túrde júrgizýdi, sondaı-aq júıeniń jumysyn baqylap, onyń turaqty qyzmetin qamtamasyz etetinin málimdedi. Bul paıdalanýshylarǵa qyzmet sapasyn jaqsartýǵa baǵyttalǵan.

Beıdoý — tolyqqandy jumys isteıtin, joǵary ónimdi jahandyq spýtnıktik navıgatsııalyq júıe. Qazirgi ýaqytta onyń orbıtasynda 50 jumys istep turǵan spýtnık bar.

Qytaıdyń spýtnıktik navıgatsııa jónindegi basqarmasynyń málimetinshe, júıe ǵalamdyq pozıtsııany anyqtaýda 10 metrge deıingi dáldikti, jyldamdyqty ólsheýde sekýndyna 0,2 metr dáldikti, al ýaqytty sınhrondaýda 20 nanosekýndqa deıingi dáldikti qamtamasyz ete alady.

PPP (Precise Point Positioning — dál núktelik pozıtsııalaý) qyzmetiniń arqasynda júıe gorızontal pozıtsııany 0,3 metrge deıin, al vertıkal pozıtsııany 0,6 metrge deıin dáldikpen anyqtaı alady.

Qytaıdyń spýtnıktik navıgatsııa jónindegi basqarmasynyń málimdeýinshe, bul júıe Qytaıdyń ekonomıkalyq jáne áleýmettik ómirine tereń engizilgen. Qazirgi ýaqytta ol paıdalanýshylarǵa joǵary dáldiktegi pozıtsııalaý, navıgatsııa jáne ýaqytty sınhrondaý qyzmetterin turaqty túrde usynyp keledi.

Eske sala keteıik, Qytaı Jańa jyly kezinde ǵaryshtaǵy taıkonavttar tort pisirdi. 

Sondaı-aq Qytaıdyń ǵaryshtyq tájirıbesinde orbıtada alǵash ret kóbelek shyqty.