Qytaıdyń Ázerbaıjan arqyly júk tasymaly 40 paıyzǵa artty
ASTANA. KAZINFORM — Qytaıdan Ázerbaıjanǵa qatynaıtyn blok-poıyzdardyń sany bir jylda 40 paıyzǵa ósti. Bul týraly Kazinform-nyń Ázerbaıjandaǵy menshikti tilshisi Azeri-Press Agency (APA) agenttigine silteme jasap habarlady.
APA málimetinshe, 2026 jylǵy qańtar-qyrkúıek aılarynda «Ázerbaıjan temir joldary» (ADY) Qytaıdan 416 blok-poıyz qabyldaǵan. Ótken jyldyń osy kezeńinde olardyń sany 296 bolǵan.
Osylaısha, bir jyl ishinde Qytaıdan qabyldanǵan blok-poıyzdar sany 120-ǵa kóbeıgen.
Qytaıdan keletin júk aǵynynyń artýy Ázerbaıjandaǵy temirjol tasymalynyń jalpy kólemi ulǵaıǵan kezeńge tuspa-tus kelip otyr. 2026 jyldyń alǵashqy toǵyz aıynda ADY 13,88 mln tonna júk tasymaldaǵan. Bul byltyrǵy sáıkes kezeńmen salystyrǵanda 11 paıyzǵa kóp.
Al tranzıttik júk tasymaly 15 paıyzǵa ósip, 5,7 mln tonnaǵa jetti.
Sonymen qatar Shyǵys — Batys baǵyty boıynsha tranzıttik tasymal kólemi 20 paıyzǵa artqan. Bul Eýrazııadaǵy negizgi kólik dálizderiniń birinde júk qozǵalysynyń kúsheıgenin kórsetedi.
Buǵan deıin Qazaqstan men Qytaı Azııa men Eýropa arasyndaǵy júk tasymalyn jedeldetýdi josparlap otyrǵany habarlanǵan.
