Qytaıdyń avtonaryǵy aqpan aıynda eki jyldyq mınımýmdy jańartty

ASTANA.KAZINFORM - Qytaı avtoónerkásibi aqpan aıynda eki jyldaǵy eń tómengi satylym kórsetkishin kórsetti, dep habarlaıdy Kazinform agenttiginiń Beıjińdegi tilshisi jergilikti BAQ-qa silteme jasap.

Qytaı avtomobıl óndirýshileri qaýymdastyǵynyń (CAAM) málimeti boıynsha, aqpan aıynda óndiris jáne satylym kólemi sáıkesinshe 1,672 mıllıon jáne 1,805 mıllıon birlikti qurady. Jyldyń alǵashqy eki aıyndaǵy jalpy kórsetkish 4,122 mıllıonǵa (óndiris) jáne 4,152 mıllıonǵa (satý) jetti. 

Qaýymdastyq bas hatshysynyń orynbasary Chen Shıhýa jyl basyndaǵy kórsetkishterge birqatar teris faktordyń áser etkenin túsindirdi. Aqpandaǵy Jańa jyl merekeleriniń uzartylýyna baılanysty jumys aıynyń 16 kúnge deıin qysqarýynan basqa, naryqqa úkimettik qoldaý baǵdarlamalaryn qaıta qaraý jáne ótken jyldyń sońynda satyp alýshylar júzege asyrǵan «alǵashqy suranys» áseri de áser etkenin aıtty. 

Ekinshi jaǵynan, eksport kerisinshe úrdis kórsetti. Aqpandaǵy halyqaralyq jetkizilimder ótken jylmen salystyrǵanda 52,4%-ǵa ósip, 672 000 kólikke jetti. Eki aıdaǵy eksport 1 352 000 birlikke jetti, bul 48,4% ósimdi bildiredi. 

Sala bolashaǵy týraly pikir bildire otyryp, Chen Shıhýa Qytaı úkimetiniń jumys esebin keltirdi, onda ishki tutynýdy yntalandyrý jáne salaýatty naryqtyq ekojúıeni qurý úshin «shamadan tys básekelestikke» (ınvolıýtsııaǵa) qarsy turý qajettiligi aıtylǵan.

Aımaqtyq sýbsıdııalaý baǵdarlamalaryn iske qosý, kóktemgi avtosalondar jumysynyń bastalýy jáne ekinshi toqsanda jańa modelderdiń engizilýi tutynýshylardyń senimin qalpyna keltirýge jáne 2026 jylǵa deıin avtoónerkásiptiń turaqty damýyn qamtamasyz etýge kómektesedi dep boljandy.

Biz buǵan deıin Qytaıdyń Geely jáne GAC avtomobılderi Reseı naryǵynan ketýi múmkin ekenin jazǵanbyz.