Qytaıdyń aýa sapasyn basqarý ádisin qoldaný múmkindigi zerdelenip jatyr – Roman Sklıar

ASTANA. KAZINFORM – Qazaqstan Qytaıdyń atmosferalyq aýa sapasyn basqarý ádisin qoldaný múmkindigin zerdelep jatyr. Bul jaıynda Májilis depýtattarynyń saýalyna Premer-mınıstrdiń birinshi orynbasary Roman Sklıardyń jaýabynda aıtylǵan.

- Osy jyldyń 12 aqpanynda Ekologııa jáne tabıǵı resýrstar mınıstriniń tóraǵalyǵymen oblystardyń, respýblıkalyq mańyzy bar qalalardyń jáne elordanyń ákimderiniń qatysýymen Turaqty damý maqsattaryna qol jetkizý turǵysynda Qytaı Halyq Respýblıkasynyń tájirıbesinde atmosferalyq aýa sapasyn basqarý júıesi boıynsha keńes ótti. Qytaıda júzege asyrylǵan keshendi, ǵylymı negizdelgen jáne júıeli ádis joǵary tıimdiligin kórsetti. Osyǵan oraı qazirgi ýaqytta atalǵan ádisti Qazaqstanda qoldaný múmkindigi zerdelenip jatyr, - dedi Roman Sklıar.

Onyń atap ótýinshe, Ekologııa kodeksiniń 206-babyna sáıkes, máslıhattar qorshaǵan ortany qorǵaý salasyndaǵy ókiletti organnyń kelisimimen belgili bir aýmaq sheginde atmosferalyq aýany qorǵaý boıynsha arnaýly ekologııalyq talap bekitýge quqyly.

- Qazirgi ýaqytta mınıstrlik óńirdiń (Shyǵys Qazaqstan oblysy) ekologııalyq ahýalyn jaqsartý úshin jedel, orta jáne uzaq merzimdi is-sharalar keshenin ázirledi. Ol 2026-2028 jyldarǵa arnalǵan atmosferalyq aýany qorǵaý boıynsha baǵdarlama ázirleý barysynda esepke alý úshin ákimdikke jiberildi. Jalpy, Óskemen qalasynyń ekologııalyq ahýalyn jaqsartý máselesi mınıstrlik pen Shyǵys Qazaqstan oblysy ákimdiginiń baqylaýynda tur jáne jumys jalǵasady, - dedi Roman Sklıar.

Búgin bes qalada aýa sapasynyń nasharlaıtyny belgili boldy.