Qytaıdyń altyn qory shamamen 230 mlrd dollarǵa jetti
ASTANA. KAZINFORM – Qytaı Halyq banki (QHB, Ortalyq bank) naýryzda altyn qoryn 90 myń ýntsııaǵa, 73,7 mln deıin arttyrdy. Bul týraly Qytaıdyń Ortalyq banki málimdedi, dep habarlaıdy Kazinform agenttiginiń menshikti tilshisi.
Qundyq máninde Qytaıdyń altyn qory 21 mlrd dollarǵa ósip, 229,6 mlrd dollarǵa jetti.
2024 jyldyń qarashasy men bıylǵy naýryz aralyǵynda Qytaı 900 myń ýntsııa altyn qosty. Qytaıdyń altyn qory osyǵan deıingi alty aı ishinde ózgerissiz qalǵan edi.
QHB Memlekettik valıýtalyq baqylaýynyń habarlamasyna sáıkes, 2025 jyldyń naýryz aıynda Qytaıdyń valıýtalyq qory 3,24 trln dollarǵa jetti. Bul osy jyldyń aqpan aıyndaǵy kórsetkishterimen salystyrǵanda 13,4 mlrd dollarǵa ósti.
Buǵan deıin AQSh prezıdenti Donald Tramp Qytaı AQSh taýarlaryna salynǵan 34% baj salyǵyn alyp tastamasa, 9 sáýirden bastap Qytaıdan ákelinetin ónimderge 50% qosymsha baj salyǵyn engizetinin málimdedi.