Qytaıdyń 6 dóńgelekti kóligi Antarktıkada 10 myń shaqyrymnan astam jol júrip ótti

ASTANA. KAZINFORM — Qytaıdyń óz kúshimen ázirlegen «Sıýebao» («Qar barysy») dep atalatyn 6 dóńgelekti kólik quraly Antarktıkanyń ekstremaldy jaǵdaılarynda júrgizilgen synaqtardy sátti aıaqtap, eshbir aqaýsyz 10 myń shaqyrymnan astam joldy eńserdi. Bul týraly seısenbi kúni Qytaıdyń 42-shi antarktıkalyq ekspedıtsııasynyń komandasy habarlady.

Ótken jyldyń 5 jeltoqsanynan bastap osy jyldyń aqpan aıynyń basyna deıin qyzyl tústi bul kólik quralynda Qytaıdyń «Chjýnshan» stantsııasynda jáne Antarktıkanyń ishki aýdandaryndaǵy bes tıptik landshaftta synaqtar júrgizildi. Atap aıtqanda, teńiz muzy, qıyrshyq tas, jumsaq jáne qatty qar jamylǵysy, sondaı-aq qatty muz jaǵdaılarynda tekserildi.

«Ekspedıtsııa komandasynyń málimetinshe, atalǵan kólik quralynyń synaqtan sátti ótýi Antarktıkada qyzmetkerlerdi jedel jerústi tasymaldaý, ǵylymı zertteýlerdi qoldaý jáne tótenshe jaǵdaıda qutqarý jumystaryn júrgizýge arnalǵan tehnıka tapshylyǵyn joıýǵa múmkindik berdi», dep jazdy Sınhýa agenttigi.

Uzaq ýaqyt boıy Antarktıkadaǵy ekspedıtsııalar kezinde Qytaı negizinen ımporttalǵan shynjyr tabandy kólik quraldaryna súıenip keldi. Alaıda mundaı tehnıkanyń jyldamdyǵy tómen, janarmaı shyǵyny joǵary ári paıdalaný men jóndeý shyǵyndary qomaqty bolyp keledi.

Synaqtarǵa tikeleı jetekshilik etken jáne Grove Mountains ekspedıtsııalyq toby basshysynyń orynbasary Sýn Penniń aıtýynsha, kádimgi shynjyr tabandy kólik quraldarynyń ortasha jyldamdyǵy shamamen 15 km/saǵ quraıdy. Al synaq nátıjeleri «Sıýebao» 6 dóńgelekti kóliginiń jumsaq qar ústinde 28 shaq/saǵ, qatty qarda 42 shaq/saǵ jyldamdyqqa deıin jete alatynyn kórsetti. Sonymen qatar, ol qatty muz ústinde 65 shaq/saǵ turaqty jyldamdyqty ustap tura alady jáne tolyq janarmaı bagymen shamamen 700 shaqyrym jol júrý qory bar.

Tótenshe mıssııalardyń birinde «Sıýebao» kóligi 12 saǵat boıy úzdiksiz jumys istep, kóriný qashyqtyǵy shamamen 3 metrdi quraǵan boran jaǵdaıynda eki baǵytta 263 shaqyrym jol júrip ótip, asa mańyzdy jabdyqtardyń jedel jetkizilýin qamtamasyz etti.

— Bul Antarktıda qurlyǵynyń ishki bólikterinde áýe qatynasy múmkin bolmaǵan qatań aýa raıy jaǵdaılarynda Qytaıdyń ekspedıtsııalar barysynda alǵash ret osynshalyqty jyldam ári tıimdi jerústi tasymalyn qamtamasyz ete alǵan jaǵdaıy boldy, — deıdi Grove Mountains ekspedıtsııalyq tobynyń jetekshisi ıAo Sıýı.

2025 jylǵy 1 qarashada Qytaıdyń 42-shi antarktıkalyq ekspedıtsııasy Shanhaı qalasynan jolǵa shyqty. Ekspedıtsııa barysynda qurlyqta jańa jabdyqtar men tehnologııalar ornalastyrylyp, synaqtan ótkiziledi.

Aıta keteıik, buǵan deıin Qytaı ǵalymdarynyń ushaq pen avtokólikti biriktirgenin jazdyq.