Qytaıdan janýar aldyrtqan qazaqstandyqtar zań aldynda jaýap bere me
ASTANA. KAZINFORM – Qazaqstanda naryǵy jyl sanap artyp keledi. Tek 2024 jyldyń ózinde otandastarymyz Qytaıdyń elektrondy platformalarynan 4,5 mıllıonnan astam tapsyrys jasaǵan.
Alaıda, taýarlar tiziminde kıim-keshek pen tehnıkadan bólek, tiri janýarlardyń da paıda bolýy qoǵamda úlken rezonans týdyrdy. Kýrerlik jóneltilim kezinde qysylyp, sýsyz jáne jemsiz ólip jatqan janýarlardyń beınejazbalary jelini shýlatty. Bul istiń quqyqtyq jaǵy men jaýapkershiligi týraly «Jibek Joly» telearnasynyń Búgin.LIVE» baǵdarlamasynda zańger Arjan Sádýaqas túsindirip berdi.
– Tiri janýarlardy tapsyrys berip alýǵa bolady, biraq onyń arnaıy erejeleri bar. Eger tapsyrys berilgen janýar Qyzyl kitapqa engen bolsa, ony Qazaqstan aýmaǵyna kirgizbeıdi. Mundaı jaǵdaıda keden qyzmetkerleri taýardy ustap, satyp alýshynyń bul isten habary bar-joǵyn anyqtaý úshin tergeý júrgizedi. Eger zań buzylsa, bul áreket tipti kontrabanda retinde baǵalanýy múmkin, – deıdi zańger Arjan Sádýaqas.
Mamannyń aıtýynsha, janýardyń ólimine nemese jaraqat alýyna alyp kelgen kez kelgen áreketsizdik úshin qylmystyq jaýapkershilik qarastyrylǵan. Qazaqstannyń Qylmystyq kodeksindegi 316-bap janýarlarǵa qatygezdik jasaý máselesin retteıdi.
– Eger janýardy jáshikke salyp, aýa kirmeıtin, sý berilmeıtin jaǵdaıda tasymaldasa, bul – qınaý bolyp sanalady. Satýshy kompanııa da, satyp alýshy da jaýapqa tartylýy múmkin. Óıtkeni janýar da múlik bolǵandyqtan, tasymaldaýshy onyń mejeli jerge zaqymsyz jetýine mindetti. Tapsyrys berýshi zardap shegýshi retinde sotqa júgine alady, biraq ol óziniń de zań aldyndaǵy mindetin umytpaýy tıis, – dep atap ótti zańger.
Qytaılyq platformalardyń óz saıasaty boıynsha da tiri janýarlardy halyqaralyq kýrermen jóneltýge tyıym salynǵan. Alaıda taýardy zat retinde jasyryp jiberý faktileri kezdesip turady. Zańger onlaın-dúkennen janýar satyp almas buryn, onyń tasymaldaý erejeleri men zańdylyǵyn jeke tekserý qajettigin eskertedi. Áıtpese bul tek aqshadan aıyrylý ǵana emes, tirshilik ıesiniń obalyna qalyp, qylmystyq iske iligýmen aıaqtalýy múmkin.
Aıta keteıik, sońǵy jyldary elimizde janýarlardy jábirleýge qatysty zań qatańdady. Endi qatygezdik kórsetkender 400 myń teńgege jýyq aıyppul tóleıtini jaıly habarlaǵan edik.