Qytaıdan jańa energetıkalyq lokomotıvterdiń alǵashqy partııasy Qazaqstanǵa jóneltildi

ASTANA. KAZINFORM – Qytaıdyń China Railway Rolling Stock Corporation (CRRC) korporatsııasy men «Qazaqstan temir joly» ulttyq kompanııasy arasyndaǵy energetıkalyq yntymaqtastyq jobasy aıasynda daıyndalǵan CKD6H lokomotıvteri Qytaıdyń CRRC Ziyang Locomotive Co., Ltd. zaýytynyń óndiris jelisinen sátti shyǵaryldy. Lokomotıvter maýsym aıynda Qazaqstanǵa jetkiziledi. Bul týraly Qytaıdyń ulttyq temirjol basqarmasynyń resmı saıty habarlady. 

Ulttyq basqarmanyń atap ótýinshe, «Bir beldeý, bir jol» bastamasyn iske asyrýdyń jarqyn úlgisin kórsetken bul joba Qazaqstan temir jol kóliginiń jasyl energııaǵa kóshýine jańa serpin berip, óńirlik ózara baılanysty nyǵaıtýǵa eleýli úles qospaq.

Belgili bolǵandaı, CKD6H lokomotıvi CRRC kompanııasynyń standartty jańa energııa platformasy negizinde, Ortalyq Azııanyń aıazdy klımattyq jaǵdaıyna beıimdelip jobalanǵan.

Lokomotıvke ishten janatyn qozǵaltqysh pen qýat batareıasy úılestirilgen gıbrıdti júıe qoldanylǵan. Tsıfrlyq tehnologııa, jasandy ıntellekt elementteri jáne jasyl energııa biriktirilgen bul qurylǵy «jasyl, qaýipsiz, aqyldy, únemdi jáne senimdi» bolýymen erekshelenedi.

Aıtylýynsha, dástúrli dızeldi lokomotıvtermen salystyrǵanda CKD6H lokomotıvine ornatylǵan ıntellektýaldy energııa júıesi otyn shyǵynyn 45 paıyzǵa deıin qysqartyp, shý deńgeıin 80 paıyzǵa tómendetýge, sonymen qatar, zııandy zattardyń shyǵarylýyn aıtarlyqtaı azaıtýǵa múmkindik beredi.

Lokomotıvtiń ár birligi jylyna orta eseppen 240 tonna kómirqyshqyl gazyn az shyǵarady.

Buǵan deıin Qytaıdyń Tanshan qalasynan Astana qalasyna LRT vagondarynyń alǵashqy eki quramy jiberilgenin jazǵan bolatynbyz.