Qytaıdan týrıst tartý úshin Narynqolda jaıaý ótkizý pýnkti ashylmaq
Qytaıdan týrısterdi kóptep tartý úshin Narynqolda jaıaý ótkizý pýnktin ashý josparlanyp otyr. Bul týraly Almaty oblysynyń ákimi Marat Sultanǵazıev búgin Ortalyq kommýnıkatsııalar qyzmetinde ótken brıfıngte aıtty, dep habarlaıdy Kazinform.
«Almaty oblysy Qazaqstandaǵy mańyzdy týrıstik ólkelerdiń biri. Respýblıkalyq týrıstik kartaǵa engen árbir onynshy nysan bizdiń óńirde ornalasqan. Osy jyly 15 týrıstik aýmaqta 337 shaqyrym taýly soqpaqtar men marshrýttardy abattandyrý júrgizilýde. Kólsaı kólderiniń ınfraqurylymyn damytý, káriz júıeleri máselesin sheshýdi qolǵa aldyq. Bıyl demeýshilerdiń esebinen tegin Wi-Fi núktesi qosylyp, beınebaqylaý kameralary ornatyldy. Osy jerde Kólsaıdyń janyndaǵy Saty aýyly jaqynda Ózbekstanda ótken Dúnıejúzilik týrıstik uıymnyń keńesinde «Eń úzdik týrıstik aýyldardyń» qataryna engizilgenin atap ótkim keledi. Bul týrızmdi damytý jumystaryna berilgen joǵary baǵa», - dedi óńir ákimi.
Oblys basshysynyń atap ótýinshe, 2023-2026 jyldarǵa arnalǵan týrıstik master-jospar ázirlendi. 2023 jyldyń jarty jyldyǵynda ishki týrıster sany 13 paıyzǵa artyp, 1,1 mln adamǵa jetti. Sheteldik týrıster 12 esege kóbeıip, 74 myń kelýshini qurady.
«Bul rette Qytaımen aradaǵy vızasyz rejımdi tıimdi paıdalanyp, týrısterdi kóptep tartý úshin Narynqolda jaıaý ótkizý pýnktin ashý josparlanýda. Atalǵan is-sharalardy iske asyrý týrıster sanyn ary qaraı da ulǵaıtýǵa múmkindik beredi»,- dedi Marat Sultanǵazıev.
