Qytaıdan taýardy zańsyz tasymaldaǵan qylmystyq toptyń qyzmeti toqtatyldy
ASTANA. KAZINFORM — Bas prokýratýra ekonomıkalyq kontrabandamen aınalysqan qylmystyq toptyń qyzmetin toqtatty.
Bas prokýratýra Qytaı Halyq Respýblıkasynan Qazaqstan Respýblıkasyna taýarlardy ekonomıkalyq kontrabandalyq jolmen uzaq ýaqyt boıy zańsyz tasymaldaýmen aınalysqan uıymdasqan qylmystyq topqa qatysty sotqa deıingi tergep-tekserýdi júzege asyrýda.
Tergeý barysynda 37 kompanııanyń ishinde uıymdasqan qylmystyq topqa qatysy bar «Metlink» jáne «Urban Green» kompanııalary boıynsha ǵana memleketke keltirilgen zalaldyń kólemi 2,7 mlrd teńgeden asqany anyqtaldy.
— 5 tamyzda Qylmystyq-protsestik kodeksiniń 128–132-baptaryna sáıkes, Qylmystyq kodeksiniń 262-babynyń 1, 2-bólikterinde (uıymdasqan topty qurý jáne oǵan basshylyq etý, sondaı-aq onyń qyzmetine qatysý), 234-babynyń 3-bóliginiń 2) tarmaǵynda (uıymdasqan qylmystyq top jasaǵan ekonomıkalyq kontrabanda) jáne 236-babynyń 3-bóliginde (uıymdasqan qylmystyq top jasaǵan kedendik tólemder men alymdardy tóleýden jaltarý) kózdelgen qylmystyq quqyq buzýdy jasady degen kúdikpen Qazaqstan Respýblıkasynyń azamattary «Sh» jáne «A» ustalyp, Almaty qalasy polıtsııa departamentiniń ýaqytsha ustaý ızolıatoryna qamaldy, — delingen Bas prokýratýra habarlamasynda.
2026 jylǵy 7 tamyzda tergeý sotynyń qaýlysymen atalǵan kúdiktilerge qatysty kúzetpen ustaý túrindegi bultartpaý sharasy sanktsııalandy.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta ketelik Almatyda jalǵan memlekettik tirkeý nómirlerin satqan kúdikti qolǵa túsken edi.
