«Qytaıdan taýar ákelip beremiz» – Májiliste 5 myń adamnan 30 mlrd teńge aldap alǵan toptyń máselesi kóterildi

Májilis depýtaty Dáýlet Muqaev Bas prokýrordyń atyna   5 myń adamnan 30 mlrd teńge aldap alǵan toptyń máselesin kóterip, saýal joldady, dep habarlaıdy Kazinform. 

«Ótken jyldyń ózinde 20 444 derek tirkelip, azamattarǵa 16,5 mlrd teńgege zalal kelgen. Al bıyl jyl aıaqtalmasa da, 15 myńǵa jýyq derek tirkelip, zardap kólemi 11 mlrd teńgeden asty. Olardyń qurbany kóbinde úıde otyrǵan analar men qyz-kelinshekter. Internet-alaıaqtyqtyń túr-túri bar. Sońǵy ýaqytta áleýmettik jeli arqyly «Baıer» degen ataýmen Qytaı, Túrkııa, AQSh-tan arzan taýar jetkizýshiler kóbeıgen. Biri elimizde tirkelip, zańdy jumys istese, endi biri halyqty tolyǵymen aldap júr. (...) Qazir baıytamyn deıtin «Baıerge» baryn bergen qara halyqtyń bazynasyn da jıi estip júr», - dedi depýtat.

Dáýlet Muqaev ózi aıtqan málimetterge naqty mysal da keltirdi.

«Solardyń biri Aıs Muratova degen laqap atpen tanymal. Shyn aty – Araılym. Ol sońǵy eki jylda halyqtyń senimine kirip, saýda jasap, ózin jaqsy jaǵynan jarnamalaǵan. Onyń ishinde Qytaıdan arzan taýarlar, ydys-aıaqtar jiberemin degen áleýmettik jeli arqyly ózin iri kásipker retinde kórsetip, qol astymda zańdy jumysshylarym bar dep eldi sendirip kelgen. Tólemderdi eshqandaı kelisimshartsyz, ıaǵnı kartalyq shotqa, aýdarma arqyly jiberýdi suraǵan. Basynda az-maz aqshaǵa qajetti taýarlardy jiberip, keıin iri somaǵa jetkende barlyq salymshyny bir kúnde aldap ketken. Sodan beri ne taýar, ne aqsha qaıtarylmaǵan. Jelidegi aqparat boıynsha elimizdiń ár óńirindegi 5 myńnan astam azamattan jalpy somasy shamamen 30 mlrd teńge jınap alyp, barlyǵyn aldap ketken. Endi saýda jasap, kún kórmekshi bolǵan azamattar aryz jazyp shaǵymdansaq ta, birneshe aıdan beri esh nátıje shyqpaıdy deıdi», - dedi depýtat.