Qytaıdan kelgen týrıster legi 9 esege artty
ASTANA. KAZINFORM – Qazaqstan Qytaıdyń týrıstik naryǵyndaǵy ornyn nyǵaıtyp keledi. 27-29 mamyr kúnderi Qytaıdyń Shanhaı qalasynda ótip jatqan ITB China 2025 halyqaralyq kórmesine Qazaqstan da qatysyp jatyr. Bul týraly Týrızm jáne sport mınıstrligi málim etti.
Onda elimiz 162 sharshy metrdi qamtıtyn biryńǵaı ulttyq stendpen otandyq týrızmdi kelýshilerge tanystyrýda. Kórme alańynda iskerlik kezdesýler, tanystyrylymdar men týrıstik ónimderdi damytýǵa arnalǵan aımaqtar qarastyrylǵan.
Otandyq delegatsııa quramynda QR Týrızm jáne sport mınıstrliginiń, Kazakh Tourism UK AQ, sondaı-aq Astana, Almaty, Aqmola, Mańǵystaý jáne Almaty oblysynyń týrızm basqarmalarynyń, qonaq úı bıznesiniń jáne jetekshi týrıstik kompanııalardyń ókilderi bar.
— Kórmeniń resmı ashylý rásimine Messe Berlin GmbH kompanııasynyń aǵa vıtse-prezıdenti Davıd Rıýtts, vıtse-prezıdenti Davıd Aksetıs, Malaızııanyń Týrızm, óner jáne mádenıet mınıstri Dato Srı Tıong Kıng Sıng, sondaı-aq Dúnıejúzilik týrıstik alıans (World Tourism Alliance, WTA) uıymynyń tóraǵa orynbasary Pen Sıýı qatysty. Qurmetti qonaqtar elimizdiń stendimen tanysyp, dástúrli qazaq taǵamdarynan dám tatyp, elimizdiń qonaqjaılyǵy men mádenı alýan túrliligine joǵary baǵa berdi. Ulttyq stendte Astana men Almaty qalalarynyń týrıstik áleýetine, sondaı-aq óńirlik tabıǵı jáne mádenı baǵyttarǵa erekshe nazar aýdarylǵan, — delingen habarlamada.
Kelýshilerge arnaıy beınematerıaldar, qytaı tilindegi aqparattyq materıaldar jáne iskerlik kezdesýler usynylǵan.
— Qytaı — Qazaqstan úshin negizgi týrıstik naryqtardyń biri. QR UQK Shekara qyzmetiniń derekterine sáıkes, 2024 jyly Qytaıdan kelgen týrıster sany 650 myń adamnan asyp, 2019 jylmen salystyrǵanda 9 ese ósken, — dep jazdy vedomstvodan.
Tek 2024 jyly elimizdegi qonaqúılerde 173 987 qytaılyq týrıstke qyzmet kórsetilgen. Bul 2023 jylmen salystyrǵanda 66%-ǵa kóp.
— Týrıster aǵynynyń artýyna eki el arasynda vızasyz rejımniń engizilýi, áýe reısteriniń kóbeıýi jáne Qytaı naryǵyna baǵyttalǵan aqparattyq jumystyń júıeli túrde júrgizilýi yqpal etti. Qazaqstannyń halyqaralyq kórmelerge belsendi qatysýy týrıster sanyn arttyrýǵa jáne eldiń Qytaı saıahatshylary arasyndaǵy tanymaldyǵyn kóterýge zor múmkindik berip otyr, — dep habarlady mınıstrlikten.
ITB China — Qytaıdaǵy eń iri B2B formatyndaǵy týrıstik kórmelerdiń biri. Bıylǵy kórmege 80 elden 600-den astam eksponent qatysýda. Іs-sharaǵa 15 000-nan astam salalyq maman, onyń ishinde 1 000 baıer men 250 BAQ ókili qatysady dep kútiledi.