Qytaıdan kelgen qandasymyz Balqash kólinen júzip ótýdi josparlap otyr
ASTANA. KAZINFORM – Qytaıda týyp-ósken qazaq balasy, dalalyq sporttyń sýda júzý túrinen talantymen tanylyp, úlken ózen, uly kólderdi kesip ótip, «Altyn balyq» degen laqap atqa ıe bolǵan Altynbek Orazbekulymen bolǵan suhbatty nazarlaryńyzǵa usynamyz.
- Altynbek áýeli ózińizdi tanystyra ketseńiz?
- Men Shynjań Altaıdyń Shińgil aýdanyna qarasty Tanashpaı degen aýylda týyp-óstim. Ózen jaǵasynda óskendikten bolar kishkentaı kezimizden sýǵa qumar boldym. Kóp ýaqytymyz sýdyń boıynda ótetin. Bizdiń áýlettiń adamdarynyń bári sýda jaqsy júze alady.
- Sýda júzý sprorty boıynsha qandaı jetistikteriń bar?
- 2017 jyly Qytaıdyń áıgili ıAntszy (Chańjııań) darııasyn endeı (ózen keńdigi alty shaqyrym) kesip óttim. Bul jetistigim úshin Shynjań tarıhyndaǵy ıAntszyny (Chańjııań) kesip ótken tuńǵysh sportshy retinde marapattaldym. 2018 jyly Qytaıdyń Hýańhy (Hýan he nemese Sary ózen, oryssha Jeltaıa reka) ózeninen bes myń adam qatysqan júzý báıgesinde birinshi bolyp kesip óttim (ózenniń eni - eki kılometr). Bul joly da atalǵan ózendi kesip ótken tuńǵysh Shynjańdyq bolyp tirkeldim. 2019 jyly Іledegi qystyq maltaýdan birinshi dárejeli júldeni enshiledim. Osy básekede ol Altaı aımaǵynyń sýdaǵy qystyq maltaý rekordyn jańaladym. 2016 jyly Huńıanchy (Qyzyltas sý qoımasy) tospasynan endeı óttim (úsh kılometr). 2017 jyly Úrimjide 10 kılometrlik sý aıdynyndaǵy báıgede 3 saǵatta qarsy jaǵaǵa jetip, rekord jańarttym. 2020 jyly jáne bıyl Altaıdaǵy Úlińgir kóli men (34 kılometr) Qanas kólinen (38 kılometr) ótýdiń halyqaralyq rekordyna daıyndalyp jatqanda ǵalamdy jaılaǵan pandemııanyń sebebinen keıinge qaldy.
- Chańjııań, Hýańhy ózenderin kesip ótýge qalaı joldama aldyń?
- Bul joldamaǵa ár oblystan 10 myńdaı adam ótinish bildirgen. Solardyń ishinen 5 myń adam irikteldi. 5 myń adamnan 3 myń adamǵa qysqardy. Keıin solardyń ishinen 3 júz adam taldandy. Sportshylar taǵy iriktelip, 100 adamǵa qysqardy. Sol 100 adam 10 kılometrge jarystyq. Osy aralyqty 3 saǵat 9 mınýtta júzip ótip, rekord jańaladym jáne osy saıysqa joldama aldym.
- Qysty kúni sýǵa túsip júrgen biraz vıdeolaryńdy kórdim. Bul jattyǵýdyń qandaı áseri bar?
- Men sýdy jaqsy kóretinim sonshalyq, qys bolsyn, jaz bolsyn sýǵa júzýime esh áser etpeıdi. Qysta sýǵa shomylý adamǵa tipti jaqsy áser etetinin baıqadym. Sýyq sý adamdy shıratady, shynyqtyrady. Revmatızm sekildi aýrýlardyń aldyn alady. Jalpy qysta sýǵa túsýden janym rahat tabady.
- Altaıda úlken ózender kóp, Shińgil ózeni de tasyǵanda ótkel bermeıtin úlken ózenderdiń biri. Sý tasyp jatqan kezde ózenge túsken kezderiń boldy ma?
- Kóktemde muz erip, qar kete bastaǵanda, sý tasqynyna baılanysty adamdardyń zardap shegýi, maldardyń sýǵa ketýi, aralda qamalyp qalýy sekildi túrli oqıǵalar bolyp turady. Osyndaı jaǵdaılarda aýyldastardyń kóbi menen kómek surap jatady. Bárine kómektesýge tyrysamyn. Kóptegen qutqarý jumystaryna atsalystym, biraz adamdardy sýdan aman alyp qalyp, alǵysyn aldym. Sýǵa ketip, múrdesi tabylmaǵan kisilerdiń sý astynan denesin súńgip alyp shyǵyp, ıesin tapsyrǵan kezderim boldy.
- Qazaq eline kelgen qadamyń qutty bolsyn! Aldaǵy josparyń týraly aıtyp berseń?
- Elge kelgeli keremet kóńil kúıde júrmin. Kóptegen aǵalarmen tanystym. Barlyǵy qoldaý bildirip, aldaǵy armanyma shabyt berip jatyr. Meniń aldaǵy josparym eń úlken kólderdiń biri – Balqash kólin kesip ótip, óz múmkindigimdi dáleldegim keledi. Qazir sol baǵytta daıyndalyp jatyrmyn.
- Balqash kólinen júzip ótýdi qashanǵa josparlap otyrsyń? Daıyndyǵyń qalaı?
- Alla buıyrsa aldaǵy jazda uıymdastyrýdy kózdep otyrmyz. Mamandarmen kóldiń sýynyń quramy týraly, pisetin ýaqyty týraly aqyldasatyn bolamyz. Daıyndyq oıdaǵydaı dep aıta alamyn. Budan buryn da Altaıdaǵy Qanas kólin kesip ótýge daıyndalǵan edim. Bári jaqsy bolady dep oılaımyn.
Bul jospar sátimen bitse, ishte júrgen úlken armandardyń biri shetelge shyǵyp, qazaq eli atynan úlken jarystarǵa qatysqym keledi. Soltústik sýyq beldeýlerge baryp, qysta júzýden de óz múmkindigimdi kórgim keledi.
- Suhbatyńa kóp raqmet! Aldaǵy armanyńa sáttilik tileımin!
