Qytaıdan Qazaqstanǵa kelýshi qandastar sany rekordtyq deńgeıge jetti
ASTANA. KAZINFORM – Qazaqstanda sońǵy jyldary kóshi-qon saldosy oń kórsetkishti kórsetip otyr. Máselen, Qytaı Halyq Respýblıkasynan keletin qandastardyń kúrt óskeni baıqalady.
Ulttyq statıstıka bıýrosy men Kóshi-qon komıtetiniń málimetterine súıensek, bul kórsetkish sońǵy jyldary joǵary mejege jetip otyr.
Atap aıtqanda, 2025 jyly Qytaıdyń 7 405 azamaty Qazaqstanǵa turaqty turýǵa kóship kelgen. Eń tómengi deńgeı 2021 jyly bolǵan. Ol jyly aspan asty elinen 249 adam kóship kelgen.
Sonymen qatar, Eńbek jáne halyqty áleýmettik qorǵaý mınıstrligi turaqty turýǵa kóship kelýshilerdiń barlyǵy etnıkalyq qazaq ekenin rastap otyr.
Kóshi-qon komıtetiniń málimdeýinshe, 2025 jyly Qytaıdan 7 405 etnıkalyq qazaqtyń kelip, «qandas» mártebesin alǵany kórsetilgen. Olardyń arasynda 3 690 otbasy bar.
– Qazirgi tańda QHR-dan keletin qandastardyń negizgi bóligi eńbekke qabiletti jastar (57,4%). Kelgen aǵaıynnyń ishinde densaýlyq saqtaý, aýyl sharýashylyǵy jáne shyǵarmashylyq salasynyń bilikti mamandary bar. Olardyń 15 paıyzy – joǵary bilimdi azamattar, – delingen Kazinform-ǵa bergen resmı jaýabynda.
Buryn qandastar negizinen shekaralas Almaty, Jetisý jáne Shyǵys Qazaqstan oblystaryna qonystansa, qazirgi statıstıka mıgratsııalyq baǵyttyń Astana men Almaty qalalaryna qaraı oıysqanyn kórsetedi.
Memleket tarapynan qonys aýdarýshylarǵa beriletin qoldaý da kúsheıtilgen. Máselen baspana satyp alý úshin beriletin birjolǵy sertıfıkat quny 7 mıllıon teńgege deıin jetti.
– Qytaı men Ózbekstannan keletin negizgi aǵyn bul elderde iri etnıkalyq dıasporanyń bolýymen baılanysty. 1991 jyldan beri Qytaıdan 378 myńnan astam qazaq tarıhı otanyna oraldy, – dep tolyqtyrdy Kóshi-qon komıteti.
Aıta keteıik, bıyl jyl basynan beri 3,3 myńǵa jýyq etnıkalyq qazaq qandas mártebesin aldy.
