Qytaıdan Qazaqstan arqyly ótetin temirjol tranzıti 11%-ǵa artty

ASTANA. KAZINFORM — 2025 jyldyń 10 aıynda Qazaqstan arqyly ótetin Qytaı tranzıttik júkteri 11% ósti – 11 mln tonnaǵa jetti. Eldiń temirjol ınfraqurylymy halyqaralyq logıstıkada mańyzdy ról atqaryp, poıyzdardy rásimdeý ýaqyty tsıfrlandyrý jobasy arqasynda 3 saǵattan 30 mınýtqa deıin qysqardy. Bul týraly Memlekettik kirister komıteti málim etti. 

— 2025 jyldyń 10 aıynda tranzıt kólemi 11,04 mln tonnaǵa jetti — bul ótken jylmen salystyrǵanda 11% kóp. Bul Qazaqstannyń mańyzdy kólik-logıstıkalyq hab retindegi rólin nyǵaıtyp otyr, - delingen habarlamada.

Rásimderdi jedeldetý jáne ashyqtyqty arttyrý maqsatynda QR QM MKK men QTJ UK AQ temirjol tranzıtin tsıfrlandyrý jobasyn júzege asyryp otyr. 

Eske salaıyq, 2023 jyldyń jeltoqsanynan bastap avtomattandyrý boıynsha pılottyq joba iske asýda, onyń aıasynda 2025 jyly 2,5 mln tonna júk rásimdeldi. Nátıjesinde bir poıyzdy rásimdeý ýaqyty 3 saǵattan 30 mınýtqa deıin qysqardy. 

Memleket basshysy Qasym-Jomart Toqaev Qazaqstan halqyna Joldaýynda álemde tranzıt úshin báseke kúsheıip bara jatqanyn aıtty.