Qytaıdan Eýropaǵa jiberiletin jerústi tasymalynyń 80% Qazaqstan arqyly ótedi
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın qytaılyq seriktesterdi kólik ınfraqurylymy salasyndaǵy jańa jobalardy birlesip iske asyrýǵa shaqyrdy.
Onyń aıtýynsha, Ortalyq Azııanyń tranzıttik jáne logıstıkalyq áleýeti Qytaıǵa orasan zor múmkindikter ashady.
− Bul óńir ejelden Shyǵys pen Batysty, Soltústik pen Ońtústikti baılanystyratyn mańyzdy saýda joldarynyń toǵysqan núktesi sanalady. Búginde Qytaıdan Eýropaǵa baǵyttalǵan jerústi tasymaldarynyń 80%-dan astamy Qazaqstan arqyly ótedi. Biz Qytaıdyń «Bir beldeý, bir jol» bastamasy aıasyndaǵy yntymaqtastyqty odan ári tereńdetýge múddelimiz. Atalǵan megajoba Orta dálizben birge «Soltústik — Ońtústik» jáne «Shyǵys — Batys» baǵyttarynyń áleýetin odan ári asha túsedi, — dedi Serik Jumanǵarın elordada «Ortalyq Azııa — Qytaı» iskerlik keńesiniń ekinshi otyrysynda.
Mınıstrdiń aıtýynsha, 2024 jyly Qytaı, Qazaqstan, Kaspıı teńizi, Ázerbaıjan, Grýzııa, Túrkııa jáne Eýropa elderine jalǵasatyn Orta dáliz arqyly júk tasymaly kólemi 60%-dan astam ósip, 4,5 mln tonnaǵa jetti.
− 2030 jylǵa qaraı bul kórsetkishti jylyna 10 mln tonnaǵa deıin jetkizýdi josparlap otyrmyz. Qytaılyq seriktesterdi kólik ınfraqurylymy salasyndaǵy jańa jobalardy birlesip iske asyrýǵa shaqyramyz, − dedi Serik Jumanǵarın.
Aıta keteıik, búgin elordada «Ortalyq Azııa — Qytaı» ІІ sammıti ótedi. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.
Eń alǵashqy sammıt 2023 jyldyń 19 mamyrda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.
2024 jyly Ortalyq Azııa óńiri men Qytaı arasyndaǵy saýda qarqyny 95 mlrd AQSh dollaryna jetken jáne onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetken.
Sonymen birge, Ortalyq Azııanyń organıkalyq ónimderi Qytaı naryǵynda joǵary baǵalanady.