Qytaıdan Eýropaǵa taýar jetkizetin júk termınaly Qyrǵyzstanda salynady
ASTANA. KAZINFORM — Qyrǵyzstandaǵy «Manas» halyqaralyq áýejaıynda aýdany 40 myń sharshy metr bolatyn júk termınalyn salý josparlanyp otyr. Ol Qytaıdan Eýropa men Taıaý Shyǵysqa taýar jetkizýge arnalǵan logıstıkalyq habtyń bir bóligi bolady. Bul týraly «Kabar» agenttigi jazdy.
Joba týraly «Qyrǵyzstan áýejaılary» ashyq aktsıonerlik qoǵamynyń basqarma tóraǵasy Manasbek Samıdınov málimdedi.
Onyń aıtýynsha, termınal qurylysy áýejaıdyń óz qarajaty esebinen qarjylandyrylmaq.
Joba halyqaralyq logıstıkalyq kompanııalardyń talaptaryna saı keletin A jáne V sanatyndaǵy kedendik baqylaýdaǵy qoımalardy salýdy kózdeıdi. Olar júktiń ártúrli túrlerin saqtaýǵa arnalǵan.
— Qoıma salyp qoıý jetkiliksiz. Halyqaralyq logıstıkalyq kompanııalardyń óz standarttary bar. Sol talaptarǵa saı bolý úshin zerthanalar men arnaıy qoımalar qarastyrylýy kerek. Mysaly, qaýipti júkterdi, medıtsınalyq preparattardy, tez buzylatyn azyq-túlik pen ósimdikterdi saqtaýǵa qajetti jaǵdaı jasalýy tıis. Sondaı-aq júktiń keıbir sanattary úshin sterıldi úı-jaılar qajet, – dedi Manasbek Samıdınov.
Jobaǵa sáıkes, Qytaıdan keletin taýarlar Qyrǵyzstanǵa avtomobıl kóligimen jetkizilip, «Manas» áýejaıyndaǵy kedendik baqylaýdaǵy qoımalarǵa ornalastyrylady. Onda júkter keıingi jóneltý úshin biriktirilip, qajet bolǵan jaǵdaıda áýe kóligimen basqa elderge tasymaldanady.
Mundaı logıstıkalyq júıe tasymaldaýǵa jumsalatyn jalpy shyǵyndy azaıtýǵa múmkindik beredi dep boljanyp otyr.
Osy aptanyń sońynda «Qyrǵyzstan áýejaılary» AQ ókilderi iri áýejaılardyń júk termınaldarynyń jumysymen jáne olardyń qyzmetindegi halyqaralyq standarttarmen tanysý úshin Qytaıǵa barýdy josparlap otyr.
Manasbek Samıdınovtyń aıtýynsha, sheteldik ınvestorlar yntymaqtastyqty bastamas buryn júk saqtaý jaǵdaılaryn ózderi tekserip, qoıma úı-jaılaryna aýdıt júrgizedi. Barlyq talapqa sáıkestigi rastalǵannan keıin ǵana olar termınaldaǵy alańdardy jalǵa alý jáne jumysyn bastaý týraly sheshim qabyldaıdy.
Buǵan deıin Shúı oblysy Soqulyq aýdanynyń Qamyshanovka aýylynda Qazaqstan men Qyrǵyzstan memlekettik shekarasynda «Tómónkú-Chúı – avtojol» halyqaralyq ótkizý pýnktiniń qurylysy bastalǵanyn habarlaǵan edik.
Endi Qyrǵyzstan halqy Qytaıǵa poıyzben qatynaı alady.
