Qytaıdan Aýǵanstanǵa shyqqan poıyz Qazaqstan arqyly barady
ASTANA. KAZINFORM — Qytaı Halyq Respýblıkasy men Aýǵanstan Islam Respýblıkasy arasynda júk tasymaly úshin jańa temirjol marshrýty uıymdastyryldy.

- Marshrýt QHR, Qazaqstan, Ózbekstan jáne Aýǵanstan arqyly ótedi. Júk quramdary Qytaı shekarasyn Qorǵas baqylaý-ótkizý pýnkti arqyly kesip ótip, Qazaqstan Respýblıkasynyń aýmaǵy (Altynkól stantsııasy) arqyly, sodan keıin Ózbekstan Respýblıkasy (Galaba stantsııasy) arqyly ótip, sońǵy mejeli pýnktke – Haıraton qalasyna (Aýǵanstan) shamamen 12-15 kúnde jetedi, - delingen QTJ habarlamasynda.
Osy baǵyt boıynsha alǵashqy poıyz Týantszetsýn stantsııasynan (Chýntsın qalasy, QHR) jolǵa shyqty. Quramyna telekommýnıkatsııalyq jabdyqtary bar 55 konteıner kiredi.
Bul baǵyttyń ashylýy Qazaqstannyń strategııalyq tranzıttik hab retindegi basty rólin nyǵaıtady.
Eske salsaq temirjol arqyly júk tasymalyn arttyrý boıynsha 4 iri joba jasalyp jatqany týraly jazǵan edik.