Qytaıdan Aýǵanstanǵa Qazaqstan arqyly taýar jetkizý máselesi talqylandy
ALMATY. KAZINFORM – Almatyda 21 qazan kúni Qazaqstannyń vıtse-premeri Serik Jumanǵarın men Aýǵanstan saýda jáne ónerkásip mınıstri Nýrıddın Azızı arasynda ótken arnaıy salalyq paneldik sessııalar men ekijaqty kezdesýde qatysýshylar Qytaıdan Aýǵanstanǵa taýar jetkizý logıstıkasynyń ózekti máselelerin jáne Qazaqstan arqyly tranzıttik jolmen qaıtarymdy logıstıkanyń múmkindikterin talqylady. Bul týraly QR Saýda jáne ıntegratsııa mınıstrliginiń baspasóz qyzmeti málim etti.
Basty máselelerdiń biri – logıstıkany arzandatýǵa qajetti vagondar men konteınerlerdiń qaıtarymdy júktelýi. Saýda jáne ıntegratsııa vıtse-mınıstri Qaırat Torebaev kezdesýde Aýǵanstannan Qazaqstanǵa ımporttyq taýarlardy qaıtarymdy júkteýge qatysty Qazaqstan tarapynan júrgizilgen múmkindikter analızi týraly aıtyp berdi. Qazaqstan negizinen jemister, kókónister, qurma, burshaq jáne basqa da azyq-túlikterdi ımporttaýǵa qyzyǵýshylyq tanytyp otyr. «Qazaqstan temir joly» ulttyq kompanııasynyń basqarýshy dırektory Baýyrjan Orynbasarov bos konteınerler men vagondardy qaıtarýdyń eki nusqasyn usyndy.
«Bos konteınerlerdi qaıtarý qıyndyqtaryn eskere otyryp, Aýǵan tarapyna poıyzdardyń aınalmaly qozǵalysyn uıymdastyrý múmkindigin qarastyrýdy usynamyz: ıaǵnı, Qytaıdan kelgen taýarlary bar konteınerler Qazaqstan arqyly Aýǵanstanǵa barady, onda aýǵan taýarlarymen júkteledi, keıin Karachı porty arqyly Qytaıǵa ketedi», - dep habarlady Baýyrjan Ýrynbasarov. – Ekinshi nusqa – júk poıyzy Aýǵanstanǵa jetip, aýǵan taýarlarymen júktelip, Qazaqstanǵa qaıtady, onda júktelgen taýarlarmen Qytaıǵa jóneltiledi.
Kezdesý barysynda ekijaqty saýda kólemin 3 mıllıard dollar AQSh-qa deıin arttyrý maqsatynda avtotasymaldar men karantındik ónimder týraly qujattardy ázirleý jáne qol qoıý qajettiligi talqylandy.
Taraptar Qytaı – Qazaqstan – Aýǵanstan marshrýty boıynsha aýǵan taýarlaryn tasymaldaý úshin logıstıkalyq hab qurý múmkindigin qarastyrdy. Bul tasymal logıstıkasyn edáýir arzandatýǵa múmkindik berer edi. Serik Jumanǵarın Aýǵan tarapyna Qazaqstannyń Sıan qalasyndaǵy qurǵaq port, Lıanıýngan portyndaǵy Qazaqstan-Qytaı logıstıkalyq termınaly jáne bolashaqta Úrimshi qurǵaq portynda salynyp jatqan termınaldyń múmkindikterin paıdalaný usynysyn bildirdi.
«Biz logıstıkany jeńildetip, retteı alamyz, biraq bizdiń ekijaqty qatynastarymyzdy aıtarlyqtaı jandandyrý úshin óndiristik kooperatsııa jobalary qajet», - dedi Qazaqstan vıtse-premeri.
Kezdesý qorytyndysy boıynsha taraptar Qazaqstan men Aýǵanstannyń aımaqtyq forýmyn uıymdastyrýǵa kelisim jasady, onda Aýǵanstan provıntsııalary men Qazaqstan aımaqtary ózara paıdaly kooperatsııa jobalaryn talqylaı alady.
2024 jyldyń qańtar-tamyzynda Qazaqstan men Aýǵanstan arasyndaǵy saýda aınalymy 330,7 mıllıon dollarǵa jetti. Qazaqstannan Aýǵanstanǵa eksport 316,5 mıllıon dollardy qurady, onyń ishinde un, kúnbaǵys maıy, tabıǵı gaz jáne tyńaıtqyshtar bar. Aýǵanstannan ımport 14,1 mıllıon dollardy qurady, negizgi taýarlary mıneraldy sýlar, jemister, shyryndar jáne alıýmınıı ónimderi boldy.
Eske sala keteıik, buǵan deıin Energetıka mınıstrligi munaı ónimderin temir jol kóligimen eksporttaýǵa tyıym salýdy kózdeıtinin jazǵan bolatynbyz.
