Qytaıdan ákelingen 39 tonnadan astam zalaldanǵan shabdaly men sábiz shekaradan keri qaıtaryldy
ASTANA. KAZINFORM - «Nur Joly» fıtosanıtarııalyq baqylaý beketinde AÓK-tegi Memlekettik ınspektsııa komıtetiniń ósimdikter karantıni jónindegi memlekettik ınspektorlary Qytaı Halyq Respýblıkasynan elimizdiń aýmaǵyna iri kólemdegi karantındik ónimderdi kirgizý áreketiniń jolyn kesti.
QR Aýyl sharýashylyǵy mınıstrligi baspasóz qyzmetiniń habarlaýynsha, muqııat tekserý men zerthanalyq saraptama barysynda jalpy salmaǵy 39,52 tonnany quraıtyn eki birdeı júk leginen qaýipti zııankester anyqtaldy.
Atap aıtqanda, salmaǵy 19 tonna shabdaly partııasynan karantındik nysan shyǵys jemis jemiri tabyldy. Al salmaǵy 20 tonna sábiz partııasynan altyn tústi kartop nematodasy anyqtaldy.
Ósimdikter karantıni salasyndaǵy halyqaralyq jáne ulttyq zańnama talaptaryna sáıkes, zalaldanǵan ónimderdiń barlyǵy jedel keri qaıtaryldy (QHR). Júktiń ıelerine qatysty ákimshilik is qozǵaldy.
-Atalǵan karantındik nysandar el aýmaǵyna kirgen jaǵdaıda azyq-túlik qaýipsizdigine qaýip tóndirip, otandyq aýyl sharýashylyǵy taýar óndirýshileriniń ónimderin shyǵyndaýy múmkin,-delingen habarlamada.
Ekologııalyq jáne azyq-túlik qaýipsizdikti qamtamasyz etý maqsatynda memlekettik shekara men fıtosanıtarııalyq baqylaý beketterindegi baqylaý kúsheıtilgen rejımde jumysyn jalǵastyryp jatyr.
Osyǵan deıin Aýyl sharýashylyǵy mınıstrliginiń zalaldanǵan astyqtyń 128 tonnasyn keri qaıtarǵany týraly jazdyq.
