Qytaıdaǵy zilzaladan keıin 2 500-den astam qutqarýshy jumys istep jatyr
ASTANA. KAZINFORM — Qytaıdyń ońtústik-batysyndaǵy Sıtszan avtonomııalyq aýdanyndaǵy Nagchý okrýgtik deńgeıdegi qalanyń Bachen ýezinde magnıtýdasy 7 balǵa jetken jer silkinisinen keıin izdestirý-qutqarý jáne zardaptardy joıý jumystary jalǵasyp jatyr.
Sınhýa agenttiginiń málimetinshe, bul týraly jergilikti bılik senbi kúni habarlady.
Beıjiń ýaqytymen beısenbi kúni saǵat 22:33-te bolǵan jer silkinisinen 16 adam qaza taýyp, taǵy 76 adam zardap shekti. Jerasty dúmpýleri saldarynan 339 úı sharýashylyǵyna tıesili ǵımarattar men mal ustaýǵa arnalǵan 20 nysan búlingen nemese qıraǵan.
Jergilikti tótenshe jaǵdaılar shtabynyń málimetinshe, senbi kúni saǵat 11:00-degi jaǵdaı boıynsha zardap shekken 76 adamnyń barlyǵy ýaqtyly medıtsınalyq kómek alyp jatqan. Al bastapqyda aýyr jaraqat alǵandar qataryna jatqyzylǵan 11 adamnyń beseýiniń jaǵdaıy jaqsaryp, jaraqaty jeńil dep baǵalanǵan.
Zardap shekken aýdandarǵa apattan keıingi kómekke qajetti zattar jetkizilip, qutqarý qyzmetteriniń mamandary da kelip jatyr. Senbi kúni saǵat 11:00-degi jaǵdaı boıynsha apat aımaǵyna 52 450 kómek quraly men jabdyq jóneltilgen. Qutqarý jumystaryna 2 500-den astam maman qatysyp jatyr.
Jetkizilgen kómektiń ishinde 4 651 shatyr, 2 000 qurastyrmaly úı, 11 772 jınalmaly tósek, 5 715 kórpe jáne qys mezgiline qajetti basqa da zattar bar. Apat aımaǵyna Wing Loong atty iri ushqyshsyz ushý apparaty da jetkizildi.
Budan bólek, jergilikti bılik 35 ýaqytsha ornalastyrý pýnktin uıymdastyrǵan. Onda Bachen ýezinen 1 600-den astam qyzmetker, Nagchý qalasynyń órt sóndirý-qutqarý bóliminen 347 órt sóndirýshi jáne qoǵamdyq qaýipsizdik organdarynan 530 polıtsııa qyzmetkeri jiberilgen. Sondaı-aq apat aımaǵyna kólik quraldary men ıisshil ıtter jetkizildi.
Senbi kúni saǵat 14:00-degi málimet boıynsha, apat aımaǵynda 949 aftershok tirkelgen. Onyń segiziniń magnıtýdasy 4,0–4,9 aralyǵynda, al 33-iniń magnıtýdasy 3,0–3,9 aralyǵynda bolǵan.
China Railway Qinghai-Xizang Group Co., Ltd. kompanııasynyń málimetinshe, juma kúni keshke Tsınhaı–Sıtszan temirjolynyń jer silkinisinen zardap shekken ýchaskesinde jyldamdyqqa qoıylǵan ýaqytsha shekteýlerdiń barlyǵy alynyp tastalǵan. Keshendi tekserý barysynda eshqandaı aýytqý anyqtalmaǵandyqtan, poıyzdar qalypty qozǵalysyna qaıta kirisken.
Qytaıdyń State Grid ulttyq elektr jelisi korporatsııasynyń málimetinshe, senbi kúni keshke apat aımaǵynda elektrmen jabdyqtaý tolyǵymen qalpyna keltirilgen.
Korporatsııanyń Sıtszandaǵy elektr energetıkalyq kompanııasy jer silkinisinen keıin apat bolǵan aýmaqqa elektr qýatyn jedel qalpyna keltirý úshin arnaıy brıgadalar jibergen. Senbi kúngi jaǵdaı boıynsha jumysqa 300-den astam qyzmetker, kólikter, elektr energııasyn óndiretin jabdyqtar jáne apattyq-qutqarý tehnıkasy jumyldyrylǵan. Olar jergilikti jedel shtabty elektrmen qamtamasyz etýge, ýaqytsha ornalastyrý pýnktterin jaryqtandyrýǵa jáne zaqymdanǵan elektr jelilerin qalpyna keltirýge kómektesken.
Nagchý qalasynyń Tótenshe jaǵdaılar basqarmasy partııa komıtetiniń hatshysy Pan Chjıtsın zardap shekken turǵyndardyń barlyǵyn qaýipsiz baspanamen, jyly kıimmen, tósek-orynmen, ystyq tamaqpen jáne taza aýyzsýmen qamtamasyz etýge ýáde berdi.
Buǵan deıin Qytaı jer silkinisinen zardap shekkenderge 80 mln ıýan bólgeni habarlandy.
