Qytaıdaǵy japondyqtarǵa kópshilik aldynda japon tilinde sóılemeý kerektigi eskertildi

ASTANA. KAZINFORM – Qytaıda 13 jeltoqsandaǵy «Nankın qyrǵynyn» eske alý kúni jaqyndap qalǵandyqtan, Japonııa elshiligi men ondaǵy konsýldyqtar jergilikti úkimet pen polıtsııadan Qytaıdaǵy japondyqtardyń qaýipsizdigin qamtamasyz etýdi surady.

Japondyq BAQ yahoojapan — nyń habarlaýynsha, Japonııanyń Qytaıdaǵy elshiligi jaqynda Qytaıda turatyn japondyqtardyń óz qaýipsizdigine mán berýin eskertetin habarlama shyǵardy.

— Jeltoqsannyń 13-i «Nankın qyrǵynyn» eske alý kúni. Tarıhqa qatysty osy kúnderi, Qytaıda bolǵan beıtarap zııan keltirý oqıǵalaryn eskere otyryp, Qytaıdaǵy barlyq japon azamattary kóshege shyqqanda óz qaýipsizdigin qorǵaýǵa burynǵydan da kóbirek kóńil bólýi kerek. Aınalańyzǵa muqııat bolyńyz jáne qaýipsizdikti qamtamasyz etińiz, ásirese balalaryńyzdy syrtqa shyǵarǵan kezde, tıisti saqtyq sharalaryn ustanyńyz — dep jazdy Qytaıdaǵy Japonııa elshiligi habarlamada. 

Elshilik Qytaıdaǵy japon azamattaryna qoǵamdyq oryndarda japon tilinde sóılesýdi múmkindiginshe azaıtýdy usynady. Sonymen qatar, japon azamattaryna japondyq ekenin ońaı anyqtaıtyn kıim men zattardy kııýden nemese alyp júrýden aýlaq bolýǵa keńes berdi.

BAQ-tyń habarlaýynsha, Japonııa elshiligi men konsýldyqtary «Nankın qyrǵynyn» eske alý kezeńinde Qytaıdaǵy japon azamattaryn qorǵaý sharalaryn kúsheıtý týraly Qytaıdyń jergilikti úkimeti men polıtsııasyna ótinish jasaǵan. 

Qytaı úkimeti bekitýine saı jyl saıyn 13 jeltoqsanda «Nankın qyrǵynynyń qurbandaryn aza tutý kúni» retinde eske alady. Ekinshi dúnıejúzilik soǵys kezinde japon áskerleri Qytaıdyń sol kezdegi astanasy Nankındi basyp alyp, onda kóptegen beıbit turǵyndardy óltirgen.

Aıta keteıik, 18 qyrkúıekte Qytaıdyń Gýandýn provıntsııasynyń Shenchjen qalasyndaǵy «japon mektebinde» oqıtyn japondyq balaǵa belgisiz qytaılyq er adam shabýyl jasap, óltirip ketkenin habarlaǵan bolatynbyz.