Qytaıdaǵy tabıǵı apattardan kelgen shyǵyn 7,5 mıllıard dollardan asty
ASTANA. KAZINFORM — Qytaıda tabıǵı apattardyń alǵashqy alty aıdaǵy saldaryna qatysty resmı derekter jarııalandy, dep habarlaıdy Kazinform agenttiginiń menshikti tilshisi QHR Tótenshe jaǵdaılardy basqarý mınıstrligine silteme jasap.
Mınıstrliktiń málimetinshe, alty aı ishinde ártúrli tabıǵı apattar 25,037 mıllıon adamǵa áser etken. Tabıǵı kataklızmderdiń saldarynan 307 adam qaza tapty nemese iz-tússiz joǵalyp ketken dep esepteledi, 620 myńnan astam turǵyn shuǵyl evakýatsııalanyp, qaýipsiz aımaqtarǵa ýaqytsha ornalastyrylǵan.
El boıynsha 29,6 myń turǵyn úı tolyǵymen qıraǵan, taǵy 347,2 myńnan astamy ártúrli deńgeıde zaqymdalǵan. Aýyl sharýashylyǵy alqaptarynyń 2,18 mıllıon gektary zardap shekken. Tikeleı ekonomıkalyq shyǵyn kólemi 54,11 mıllıard ıýanǵa baǵalanyp otyr – bul shamamen 7,6 mıllıard AQSh dollaryna teń.
Negizgi shyǵyn jer silkinisteri men tasqyndardan kelgen. Sonymen qatar, eldiń birneshe aımaǵynda burshaq, qurǵaqshylyq, taıfýn, úsik, boran jáne orman órtteri tirkelgen.
Mınıstrlik úshinshi toqsanda iri tótenshe jaǵdaılardyń týyndaý qaýpi dástúrli túrde ósetinin atap ótti. Bul óndiristik belsendiliktiń artýymen, týrıstik aǵymnyń kóbeıýimen jáne kólik, qonaq úı men oıyn-saýyq salalaryna túsetin maýsymdyq júktemeniń artýymen baılanysty.
Shilde men tamyz aılarynda sý tasqynynyń sharyqtaý maýsymy bastalady, bul kezeńde nóser jaýyn, aptap ystyq jáne taıfýndar jıileıdi. Bul qosymsha alańdaýshylyq týǵyzyp otyr.
QHR bıligi barlyq tıisti jergilikti mekemelerge tótenshe jaǵdaılardyń aldyn alý jáne monıtorıng jumystaryn kúsheıtip, qaýip-qaterlerdi der kezinde anyqtap, halyq pen ınfraqurylymdy qorǵaý sharalaryn qamtamasyz etýdi tapsyrdy.
Buǵan deıin Qytaıda qatty sý tasqyny saldarynan 80 myńnan astam adam evakýatsııalanǵany habarlanǵan bolatyn.