Qytaıdaǵy synaqta jańa dıabetke qarsy preparat tanymal dárilerden tıimdirek boldy
ASTANA. KAZINFORM - Danııalyq Novo Nordisk jáne qytaılyq United Laboratories International Holdings birlesip ázirlegen dıabetke qarsy tájirıbelik preparat Qytaıda júrgizilgen klınıkalyq zertteýde jaqsy nátıje kórsetti.
Kompanııa málimetinshe, UBT251 dep atalatyn jańa preparat zertteýdiń ekinshi kezeńinde qandaǵy qant deńgeıin aıtarlyqtaı tómendetip, dene salmaǵyn azaıtqan.
Zertteýge Qytaıdan 2-tıpti dıabetke shaldyqqan 211 eresek patsıent qatysty. Buǵan deıin olar dıeta, dene belsendiligi nemese metformın arqyly em qabyldaǵan. 24 apta boıy qatysýshylarǵa aptasyna bir ret ártúrli dozada UBT251, semaglýtıd nemese platsebo engizilgen.
Emdeý qorytyndysy boıynsha jańa preparatty qabyldaǵan topta uzaq merzimdi qandaǵy qant deńgeıi orta eseppen 2,16%-ǵa deıin tómendegen. Salystyrý úshin, semaglýtıd qabyldaǵan topta bul kórsetkish 1,77%-dy, al platsebo alǵandarda 0,66%-dy quraǵan.
UBT251 salmaq tómendetýde de aıqyn nátıje kórsetti. Preparatty qabyldaǵan qatysýshylar dene salmaǵynyń orta eseppen 9,8%-yna deıin joǵaltqan. Semaglýtıd tobynda bul kórsetkish shamamen 4,8%, al platsebo tobynda 1,4% boldy.
Zertteý barysynda jańa preparatty qabyldaǵan patsıentterdiń beli juqaryp, qan qysymy men qandaǵy maı deńgeıi jaqsarǵany anyqtaldy. UBT251 qaýipsizdik turǵysynan osy sanattaǵy ózge dárilermen shamalas nátıje kórsetken.
Martın Holst Lange kompanııa nátıjelerge qanaǵattanatynyn aıtyp, 2026 jyldyń ekinshi jartysynda 2-tıpti dıabetke shaldyqqan naýqastardyń qatysýymen aýqymdy halyqaralyq zertteýdiń kelesi kezeńin bastaýdy josparlap otyrǵanyn málimdedi.
Sondaı-aq artyq salmaǵy nemese semizdigi bar shamamen 330 adam qatysyp jatqan taǵy bir halyqaralyq zertteý qazirdiń ózinde júrgizilip jatyr. Onyń nátıjeleri 2027 jyly jarııalanbaq.
Buǵan deıin Ulybrıtanııa men Brazılııanyń densaýlyq saqtaý organdary semaglýtıd pen lıraglýtıdke negizdelgen GLP-1 retseptor agonısteri tobyna jatatyn salmaq túsirýge arnalǵan tanymal preparattardy (Ozempic, Wegovy, Saxenda) qoldanǵan patsıentterde jedel pankreatıttiń damý qaýpi bar ekenin eskertken bolatyn.
Osyǵan deıin Japonııanyń Qazaqstanǵa densaýlyq saqtaýdy damytýǵa 7 mln dollardan astam granttyq qoldaý kórsetetini týraly jazdyq.
