Qytaıdaǵy kóshkin: 2 adam qaza tapty, 5 adam áli izdestirilip jatyr

ASTANA. KAZINFORM — Qytaıdyń ońtústigindegi Gýandýn provıntsııasynda ornalasqan Gýanchjoý qalasynyń Baııýn aýdanynda sársenbi kúni nóser jańbyr saldarynan kóshkin júrip, 14 adam úıindi astynda qalǵan, dep jazady Sınhýa.

Beısenbi kúni tańǵy 9:00-ge deıin olardyń 9-y qutqaryldy.

Qutqarylǵandardyń ekeýi kóz jumyp, jeteýi túrli deńgeıde jaraqat alǵany belgili boldy.

Qalǵan bes adamdy izdestirý jumystary jalǵasyp jatyr.

Eske salsaq, Gýandýn provıntsııasynda jaýǵan nóser jaýyn avtokólik joldaryndaǵy qozǵalysty qıyndatyp, sý tasqyny qaýpin kúsheıtkenin jazǵanbyz.

Provıntsııanyń kólik departamentiniń málimetinshe, qatty jaýyn saldarynan úsh ýchaskede jyldamdyqty avtomagıstral, alty ýchaskede respýblıkalyq jáne provıntsııalyq mańyzy bar tasjol, sondaı-aq 25 aýylǵa aparar joly jabyq tur.

Sonymen qosa Qytaıdyń Іle qazaq avtonomııalyq oblysyna qarasty Mońǵolkúre aýdanynda aspaly kópir úzilip, 5 adam qaza bolǵany anyqtaldy.

Buǵan deıin Qytaı tabıǵı apattan zardap shekken aımaqtarǵa kómek kórsetý úshin 1,015 mıllıard ıýan (shamamen 142 mıllıon dollar) bólgeni málim boldy.