Qytaıdaǵy kópqabatty úıdegi órt: 3 adam qaza taýyp, 23 adam zardap shekti
ASTANA. KAZINFORM — Qytaıdyń soltústigindegi kópqabatty ǵımarattaǵy órtten qaza tapqandar sany úsh adamǵa jetti, dep habarlaıdy Sınhýa.
Senbi kúni keshke Qytaıdyń Shansı provıntsııasyna qarasty Taııýan qalasyndaǵy kópqabatty ǵımaratta bolǵan órt saldarynan úsh adam qaza taýyp, taǵy 23 adam zardap shekti. Bul týraly jergilikti bılik habarlady.
Taııýan qalasy ákimdigi derekterine sáıkes, órt jergilikti ýaqyt boıynsha shamamen saǵat 20:00–de Sıaodıan aýdanynda tutanǵan.
Sıaodıan aýdandyq partııa komıtetiniń úgit-nasıhat bólimi málim etkendeı, zardap shekkenderdiń ishinde toǵyz adam aýyr jaraqat alǵan.
Qazirgi ýaqytta órttiń shyǵý sebepteri anyqtalyp jatyr. Sonymen qatar, onyń saldaryn joıý jumystary júrgizilýde.
Buǵan deıin Qytaı Fılıppınnen arandatýshylyq pen jalǵan aqparatty dereý toqtatýdy talap etkenin jazǵan edik.
