Qytaıdaǵy otandastar referendýmda alǵashqylardyń biri bolyp daýys beredi

ASTANA. KAZINFORM – AES calý boıynsha referendýmda daýys berý úshin alǵashqylardyń biri bolyp Qytaıda sheteldik ýchaskeler ashylady. 

Referendým ýchaskeleri Qazaqstannyń Beıjiń, Shanhaı jáne Gonkongtaǵy dıplomatııalyq ókildikteriniń aýmaqtarynda uıymdastyrylǵan. № 389 ýchaske Qazaqstannyń Qytaıdaǵy Elshiliginiń ǵımaratynda – Beıjiń qalasynda ornalasqan. 

– Respýblıkalyq referendýmǵa daıyndyq jumystary júrgizilip jatyr. Daýys berý kúni, orny jáne ýaqyty týraly aqparat ornalastyryldy, - dep habarlady № 389 ýchaskesindegi saılaý komıssııasynyń tóraǵasy Nurlan Aqqoshqarov. 

Onyń aıtýynsha, № 389 referendým ýchaskesine Beıjińniń joǵary oqý oryndarynda oqıtyn stýdentter, sondaı-aq QHR-da ýaqytsha jumys isteıtin jáne turatyn otandastarymyz, qazaqstandyq týrıster jáne issaparda júrgender keledi dep josparlanǵan. 

Beıjiń, Shanhaı jáne Gonkongtaǵy referendým ýchaskeleri jergilikti ýaqyt boıynsha 7.00-de ashylady, al daýys berý 20.00-de aıaqtalady. 

Buǵan deıin biz London men Bishkektegi saılaý ýchaskeleri Qazaqstandaǵy AES boıynsha referendýmǵa qalaı daıyndalyp jatqany týraly jazǵan bolatynbyz.