Qytaıdaǵy Qazaqstan týrızmi jyly: estrada juldyzdary Beıjińde óner kórsetti
BEIJІŃ. KAZINFORM – Búgin Beıjińde Qytaıdaǵy Qazaqstan týrızmi jylynyń ashylýy aıasynda qazaq estradasynyń juldyzdary óner kórsetti.
Atap aıtsaq, gala-kontsertke Qazaqstannyń halyq ártisi Roza Rymbaeva, QR eńbek sińirgen ártisi Maıra Muhamedqyzy, opera ánshisi Zarına Altynbaeva, «Ulytaý» etno-rok toby, Abaı atyndaǵy QazUOBT hor ujymy, «Serper» jáne «Sazgen sazy» ansamblderiniń shyǵarmashylyq ujymdary, «Astana Balet» balet trýppasy bastaǵan ónerpazdarymyz qatysty.
Qazaqstan týrızmi jyly resmı ashylýynyń gala-kontserti China National Opera House ótti. Saltanatty keshte otandyq ártister halqymyzdyń mádenıeti men ónerin taǵy bir pash etti.
Ánshilerimiz qytaı halqyna qurmet retinde olardyń ulttyq ánderin de shyrqady. Sonymen qatar kontsertke jınalǵan qonaqtar qytaılyq ártisterdiń de ónerin tamashalady.
Aıta ketsek, jyldyń resmı ashylýy halyqaralyq týrızm men ınvestıtsııalarǵa arnalǵan forýmnan bastalyp, Qazaqstannyń kórmesi jáne etno-aýyldaǵy mádenı is-sharalarmen jalǵasty. Qazaqstan delegatsııasy qatarynda mınıstrlik, týrızm, bıznes, sport pen óner salasynyń ókilderi bar.
