Qytaıdaǵy Qazaqstan týrızmi jyly: Qazaqstandyq alǵashqy delegatsııa búgin Beıjińge bardy
BEIJІŃ. KAZINFORM – Aldaǵy 28-29 naýryz kúnderi Qytaı Halyq Respýblıkasynyń astanasy Beıjiń qalasynda Qazaqstan týrızmi jylynyń resmı ashylý rásimi ótedi.
Osyǵan oraı Qazaqstannan shyqqan alǵashqy delegatsııa músheleri búgin Beıjińge arnaıy ushyp keldi. Olardyń qatarynda bılik ókilderinen bólek, ánshiler, kúıshiler, bıshiler, sonymen qatar álemdik arenada el namysyn abyroımen qorǵap júrgen tanymal sportshylarymyz da bar.
Aıta ketsek, ótken jyly prezıdent Qasym-Jomart Toqaev «Bir beldeý, bir jol» halyqaralyq yntymaqtastyǵynyń III forýmyna qatysýǵa qazan aıynda Beıjińge barǵan bolatyn. Forým aıasynda eki el basshylary kelissóz ótkizip, birqatar qujatqa qol qoıdy. Osy kezdesýde 2024 jyl – Qytaıdaǵy Qazaqstan týrızmi jyly bolyp jarııalanǵan edi.
Osyǵan oraı QR Týrızm jáne sport mınıstri Ermek Marjyqpaev Qytaıdyń iri qalalarynda birqatar mańyzdy is-sharalardy ótkizý tujyrymdamasyn usynyp, elimizdiń Qytaıdaǵy týrızm jylyna baılanysty aýqymdy is-sharalardy ótkizýdi qolyna aldy. Atap aıtsaq, Qytaı Halyq Respýblıkasynyń Mádenıet jáne týrızm mınıstri Sýn Elımen kezdesip, Qytaıdaǵy Qazaqstan týrızmi jylyn ótkizý josparlaryn jáne týrızm salasyndaǵy ózara yntymaqtastyq odan ári damytý máselelerin talqylaǵan bolatyn.
«Qytaı Qazaqstan úshin basym týrıstik naryq pen mańyzdy seriktesterdiń biri sanalady. Óıtkeni eki eldiń geografııalyq ornalasýy, Jibek joly boıyndaǵy tarıhy tereń baılanysy barlyq salada ózara yqpaldastyqqa oń áserin tıgizedi. Búgingi tańda elderimiz arasyndaǵy týrıstik aǵyny pandemııaǵa deıingi kórsetkishke qaıta kóterilip otyr», – dep atap ótken edi Ermek Marjyqpaev.
Máselen, Qytaı týrısteri byltyr Qazaqstanǵa eń kóp kelgen TOP-5 eldiń qataryna endi. Statıstıka derekteri boıynsha, ótken jyldyń 9 aıynda Qazaqstanda 75 myńnan astam qytaılyq týrıstke qyzmet kórsetilgen. Al Qytaıdan Qazaqstanǵa kelýshilerdiń jalpy sany 200 myń adamnan asty.
Vedomstvo basshysy byltyr eki el arasynda vızasyz rejım engizilgenin jáne bıyl tikeleı reıster sanyn aptasyna 30-ǵa deıin ulǵaıtý josparyn eskere otyryp, týrıstik aǵynnyń odan ári artýy múmkin ekenin atap ótti. Mınıstrdiń málimdeýinshe, bıyl Qytaıdyń 7 iri qalasynda (Beıjiń, Sıan, Shanhaı, Úrimshi, Gonkong, Hanchjoý, Chendý) TOP-20 otandyq týrıstik oryndar tanystyrylady.
