Qytaıdaǵy qazaq medıtsınalyq emhanasy ujymdyq marapatqa ıe boldy – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Qazaqstan, Qyrǵyzstan jáne Ózbekstan sý jóninde kelisimge keldi – ÓzA
Qazaqstan, Qyrǵyzstan jáne Ózbekstan jazǵy vegetatsııalyq maýsym qarsańynda sýarý sýyn bólý kestesin bekitti. Sarapshylar bul kelisimdi Ortalyq Azııadaǵy sý dıplomatııasyndaǵy mańyzdy qadam retinde baǵalap otyr.
Bul týraly osy aptada «ÓzA» aqparat agenttigi habarlady.
Habarlamada aıtylýynsha, Tashkentte ótken úsh eldiń sý-energetıka salasy basshylarynyń kezdesýi qorytyndysynda úshjaqty hattamaǵa qol qoıyldy. Qujatqa sáıkes, aldaǵy eki aıda Toqtoǵul sý qoımasy arqyly jiberiletin sý kólemi men tártibi naqty keste negizinde kelisilgen.
Mamandardyń aıtýynsha, sý bólý kestesiniń aldyn ala bekitilýi fermerler men sý sharýashylyǵy uıymdaryna josparlaý jumystaryn tıimdi júrgizýge múmkindik beredi. Sonymen qatar Qazaqstannyń Qyrǵyzstanǵa elektr energııasyn jetkizýi Toqtoǵul sý qoımasy qoryndaǵy sýdy jazǵy sýarý kezeńine saqtaýǵa jaǵdaı jasaǵan.
Úsh el vedomstvolary basshylarynyń kelesi kezdesýi maýsym aıynyń ortasynda Bishkek qalasynda ótedi. Onda shilde–qyrkúıek aılaryna arnalǵan sý jetkizý kólemi men jańa kesteler talqylanady.
Sondaı-aq osy aptada «ÓzA»-da «Ózbekstannyń altyn-valıýta rezervteri 70 mıllıard dollardan asty» degen taqyryptaǵy aqparat jarııalandy.
Atalǵan BAQ-tyń dereginshe, Ózbekstan Ortalyq banki málimetine sáıkes, eldiń altyn-valıýta rezervteri 2026 jylǵy 1 mamyrdaǵy jaǵdaı boıynsha 70,9 mıllıard dollarǵa jetti.
Sáýir aıynda halyqaralyq rezervter kólemi shamamen 2 mıllıard dollarǵa artqan. Buǵan álemdik naryqtaǵy altyn baǵasynyń ósýi negizgi sebep bolǵan. Nátıjesinde rezerv quramyndaǵy altyn aktıvteriniń quny 743,6 mıllıon dollarǵa kóbeıip, 61,6 mıllıard dollarǵa jetti.
Sonymen qatar rezervtegi altynnyń fızıkalyq kólemi azdap qysqarǵan. Naýryz aıynda 13,4 mıllıon troı ýntsııa bolǵan kórsetkish sáýir sońynda 13,3 mıllıon troı ýntsııaǵa deıin tómendegen. Soǵan qaramastan, altyn baǵasynyń qymbattaýy jalpy aktıvterdiń joǵary deńgeıde saqtalýyna múmkindik berdi.
Sondaı-aq shetel valıýtasyndaǵy rezervter 7,6 mıllıard dollardan 8,7 mıllıard dollarǵa deıin ósti.
Sarapshylardyń pikirinshe, halyqaralyq rezervterdiń artýy eldiń qarjylyq turaqtylyǵyn kúsheıtip, syrtqy ekonomıkalyq táýekelderge tózimdiligin arttyrýǵa yqpal etedi.
Qazaq medıtsınalyq emhanasy «Shyńjańdy damytý jáne qurý úshin» syılyǵyna ıe boldy – Altaı aqparaty
Taıaýda Aımaqtyq juńı medıtsınasy (qazaq medıtsınalyq emhanasy) «Shyńjańdy damytý jáne qurý úshin» ujymdyq marapatyna ıe boldy.
Bul marapat mekemeniń óńirdegi densaýlyq saqtaý salasyn damytýǵa qosqan úlesi men kópultty halyqqa kórsetip otyrǵan medıtsınalyq qyzmetiniń joǵary deńgeıin aıqyndaıdy, dep habarlaıdy qytaılyq «Altaı aqparaty».
Atalǵan basylymnyń dereginshe, medıtsınalyq mekeme uzaq jyldan beri dástúrli qytaı medıtsınasy men qazaq medıtsınasy emshiligin qatar damytyp, klınıkalyq dıagnostıka men emdeý sapasyn jetildirýge basymdyq berip keledi. Sonymen qatar ǵylymı-zertteý jumystary men ınnovatsııalyq jobalardy engizý baǵytynda birqatar nátıjelerge qol jetkizgen.
Qazirgi ýaqytta mekemede ulttyq jáne avtonomııalyq deńgeıdegi 10-nan astam beıindi bólim jumys isteıdi. 40-tan astam ǵylymı joba júzege asyrylyp, birqatar patentter men ǵylymı-tehnologııalyq jetistikter alynǵan. Sondaı-aq jańa medıtsınalyq tehnologııalardy engizý arqyly óńirlik deńgeıdegi olqylyqtardy tolyqtyrýǵa úles qosyp keledi.
2025 jyly emhana úshinshi deńgeıli A sanatyndaǵy ulttyq medıtsına standartynan sátti ótti. Bul mekemeniń dıagnostıka, emdeý jáne ınfektsııalyq baqylaý salalaryndaǵy múmkindikteriniń aıtarlyqtaı artqanyn kórsetedi.
Sonymen qatar emhana áleýmettik jaýapkershilik aıasynda aýyldyq jáne shalǵaı eldi mekenderde turaqty túrde tegin medıtsınalyq tekserýler men qaıyrymdylyq sharalaryn uıymdastyryp keledi. Orta eseppen jylyna 20-dan astam medıtsınalyq kóshpeli qabyldaý ótkizilip, halyqqa tegin dári-dármek pen keńes berý qyzmetteri kórsetilýde.
Mekeme basshylyǵy bul marapatty aldaǵy jumysty odan ári jandandyrýǵa serpin beretin mańyzdy jetistik retinde baǵalap, ulttyq medıtsına men zamanaýı densaýlyq saqtaý júıesin qatar damytý baǵytyndaǵy jumystardy jalǵastyra beretinin málimdedi.
Qazaqstan Túrkııaǵa «halal» standartyna saı et ónimderin eksporttaýǵa daıyn – Eurasia Today
Prezıdent Qasym-Jomart Toqaev Qazaqstannyń Túrkııa eline «halal» standartyna saı et ónimderin eksporttaýǵa daıyn ekenin málimdedi. Bul týraly ol Rejep Taıyp Erdoǵan qatysýymen ótken Qazaqstan–Túrkııa bıznes forýmynda aıtty, dep habarlaıdy Eurasia Today.
Atalǵan aqparat agenttiginiń málimeti boıynsha, Prezıdent Qazaqstannyń agroónerkásip salasyndaǵy eksporttyq áleýeti joǵary ekenin atap ótti. Byltyr 27 mıllıon tonna astyq jınalyp, aýyl sharýashylyǵy ónimderiniń eksporty sońǵy bes jylda 1,8 ese artqan.
Sonymen qatar, Qazaqstan Túrkııamen agroónerkásiptik yntymaqtastyqty keńeıtýge múddeli. Atap aıtqanda, bıdaı men burshaqty tereń óńdeý, jylyjaı keshenderi men jelatın óndirisi sııaqty birlesken jobalar qarastyrylyp otyr.
Qytaıdan Qazaqstanǵa jemis-jıdek eksporty 2026 jyldyń birinshi toqsanynda bes esege ósti – Halyq gazeti
2026 jyldyń birinshi toqsanynda Qytaı men Qazaqstan shekarasyndaǵy Jemeneı-Maıqapshaǵaı shekara ótkeli arqyly Qazaqstanǵa eksporttalǵan jemis-jıdek kólemi aıtarlyqtaı artty. Bul týraly Shyńjańdaǵy Jemeneı kedeniniń málimetine súıenip Qytaıdyń Halyq gazeti basylymy habarlady.
Keden málimetine sáıkes, atalǵan kezeńde jemis-jıdek eksporty ótken jyldyń sáıkes kezeńimen salystyrǵanda 532,5 paıyzǵa ósip, 54,48 mln ıýanǵa (shamamen 7,97 mln AQSh dollary) jetken.
Sonymen qatar, birinshi toqsanda Jemeneı–Maıqapshaǵaı shekara ótkeli arqyly júzege asqan ımport pen eksport kólemi turaqty ósim kórsetken. Saýda qurylymy da ártaraptandyrylyp keledi.
Statıstıkaǵa sáıkes, osy ótkel arqyly ımporttalǵan aýyl sharýashylyǵy ónimderiniń jalpy quny 36,51 mln ıýandy qurap, ótken jyldyń osy kezeńimen salystyrǵanda 62,4 paıyzǵa artqan.
Negizgi ımporttyq taýarlar qatarynda dándi jáne maıly daqyldar, mal sharýashylyǵy ónimderi, sondaı-aq arnaıy aýyl sharýashylyǵy ónimderi bar.
Budan bólek, keden organdary jıhaz, aksessýarlar jáne keramıkalyq buıymdar eksportynyń da óskenin habarlady.
Sonymen qatar osy aptada Halyq gazeti basylymynda «Qazaqstandyq týrıster Haınan baǵytynda belsendilik tanytty» degen mazmundaǵy aqparat jaryq kórdi.
Bıylǵy 1 mamyr merekesi kezinde Haınan ólkesine kelgen sheteldik týrıster sany artty. Bul týraly Haınan ólkelik úkimeti málimdegen.
Resmı málimetke sáıkes, mereke kúnderi aımaq 10 myńnan astam vızasyz sheteldik qonaqty qabyldaǵan. Bul ótken jyldyń sáıkes kezeńimen salystyrǵanda 14,5 paıyzǵa kóp.
Haınanǵa kelgen sheteldik týrısterdiń basym bóligin Reseı, Qazaqstan, Sıngapýr, Malaızııa jáne Belarýs azamattary quraǵan.
Ólkelik bıliktiń málimetinshe, Haınan erkin saýda porty aıasyndaǵy vızasyz kirý saıasaty kezeń-kezeńimen keńeıtilip keledi. Qazirgi ýaqytta álemniń 86 eliniń azamattary Haınanǵa qarapaıym tólqujatpen vızasyz kire alady.
Amerıkalyq Shekspır qaýymdastyǵy Ysparta jobasyn halyqaralyq deńgeıde baǵalady – TRT
Túrkııanyń Ysparta qalasy óner arqyly halyqaralyq mádenı dıalogty damytýǵa qosqan úlesi úshin AQSh-ta marapatqa ıe boldy, dep jazady «TRT».
Túrkııalyq basylymnyń dereginshe, Súleıman Demırel ýnıversıteti men Ysparta mýnıtsıpalıteti birlesip 2018 jyldan beri uıymdastyryp kele jatqan Halyqaralyq Shekspır festıvali Amerıkalyq Shekspır qaýymdastyǵy tarapynan «Qoǵamdyq úles» atalymy boıynsha marapattaldy. Bul – uıymnyń 54 jyldyq tarıhynda AQSh aýmaǵynan tys jobaǵa alǵash ret berilgen syılyq.
Festıval Ysparta men Antalııa qalalarynda ótip, teatr qoıylymdary, ǵylymı konferentsııalar jáne mádenı is-sharalardy qamtıdy. Uıymdastyrýshylardyń aıtýynsha, joba halyqaralyq mádenı yqpaly men keń aýdıtorııany qamtýymen erekshelenedi.
Marapattaý rásimi AQSh-tyń Denver qalasynda ótti. Sarapshylar festıvaldi óner men ádebıetti biriktiretin jáne jahandyq mádenı baılanystardy nyǵaıtatyn mańyzdy joba retinde baǵalady.
Sondaı-aq osy aptada «TRT» basylymynda «Halyqaralyq nóldik qaldyq forýmy Stambýlda ótedi» degen taqyryptaǵy aqparat jarııalandy.
Stambýl qalasynda 5–7 maýsym kúnderi «Nóldik qaldyq» tujyrymdamasyna arnalǵan Halyqaralyq nóldik qaldyq forýmy ótedi.
Іs-sharany «Nóldik qaldyq» qory uıymdastyryp otyr. Forým «Antalııaǵa aparar jol: Klımattyq is-qımyl retinde nóldik qaldyq» taqyrybymen ekinshi ret ótkiziledi.
Forým aıasynda 160-tan astam elden myńdaǵan qatysýshy jınalyp, klımattyń ózgerýi men ekologııalyq jaýapkershilik máselelerin talqylaıdy. Uıymdastyrýshylardyń málimetinshe, jıyn jahandyq ekologııalyq bastamalardy ilgeriletýge baǵyttalǵan.
Túrkııa prezıdentiniń jubaıy Emıne Erdoǵan forýmnyń mańyzdylyǵyn atap ótip, onyń klımattyq daǵdarysqa qarsy halyqaralyq yntymaqtastyqty kúsheıtýge úles qosatynyn aıtty.
