Qytaıdaǵy qazaq boksshy Toqtarbek Tańatqanǵa 100 myń ıýan tartý etildi
Bokstan Hanjchoý qalasynda ótken HІH jazǵy Azııa oıyndarynyń chempıony Toqtarbek Tańatqanulyn óziniń týǵan jerinde Altaı qalalyq partkomynyń orynbasary Jeńishan Qurmanuly 100 myń ıýanmen (6,5 mıllıon teńge) arnaıy marapattady, dep habarlaıdy Kazinform.
Bul týraly qytaıdyń ortalyq halyq radıosy resmı túrde málim etti.
Altaı qalalyq partkom basshylary Tańatqanulyn marapattaý úshin onyń úıine arnaıy amandasa barǵan.
«Qala basshylary halyqtyń yqylasty sálemi men izgi tilegin jetkizip, ári 100 myń ıýan syılyq aqsha usynýmen qatar, Toqtarbektiń alǵashqy jattyqtyrýshysy Murat Boshaıulyna 50 myń ıýan aqsha syılap, daryndy boksshyny baýlyǵan ulaǵatty eńbegine shynaıy alǵys bildirdi», - delingen habarlamada.
Sondaı-aq, Toqtarbektiń úıine amandasa barǵan jergilikti atqaminerler osyndaı chempıondy erjetkizgen Toqtarbektiń ata-anasyna da alǵystaryn bildirdi.
Shara barysynda Toqtarbek endigi armany Olımpıadany baǵyndyrý ekenin de atap ketti.
«Bul natıjege qol jetkizgende eń áýeli ata-anamnyń mápelep ósirgen shapaǵatyna, jattyqtyrýshymnyń baýlyǵan eńbegine erekshe alǵys aıtamyn. Sondaı-aq, barlyq jaǵdaıymyzdy jasap otyrǵan el bıligine, meni qoldap kele jatqan barlyq jankúıerlerime shynaıy alǵysymdy aıtamyn. Bul Azııa oıyndary men úshin úlken tájirıbe boldy. Endigi maqsat - kelesi jyly ótetin tórt jyldyq doda Olımpıada oıyndarynda top jarý», - dep atap ótti boksshy.
Esterińizge sala keteıik, qytaıda turatyn qandasymyz Toqtarbek Tańatqan Hanchjoý qalasynda ótken HІH jazǵy Azııa oıyndarynda 80 keli salmaqta judyryqtasyp, bas júldeni qanjyǵasyna baılaǵan bolatyn.
Ol fınalda ataqty fılıppındik boksshy Eýmır Felıks Marsıalmen judyryqtasyp, jeńis tuǵyrynyń eń bıik satysyna kóterilip qana qoımaı, Parıj Olımpıadasynyń joldamasyna da qol jetkizdi.
