Qytaıdaǵy qandasymyz Úrimji marafonynyń chempıony atandy
ASTANA. KAZINFORM — Qytaıda turatyn qandasymyz Úrimji marafonynda top jardy.
Qytaılyq Tıan-Shan portalynyń málimetinshe, 2026 jylǵy Úrimji marafony 13 qyrkúıek kúni ótken. Bıyl marafonǵa qatysýshylardyń sany alǵash ret 15 myńnan asty. Onyń 67 paıyzy eldiń basqa aımaqtary men Kenııa, Kanada sııaqty alys-jýyq shet elderden kelgen. Tolyq marafonda 5000 jelaıaq júgirgen.
Erler arasynda Qytaıda turatyn qandasymyz, Mońǵulkúre aýdanynyń týmasy Aıqyn Baqytbekuly máre syzyǵyn birinshi bolyp kesip ótti. Onyń fınıshke jetý ýaqyty — 2 saǵat 25 mınýt 58 sekýnd.
Áıelder arasyndaǵy tolyq marafonnyń jeńisi qytaılyq sportshy Veı Chýnhýaǵa buıyrdy.
Úrimji marafony 2023 jyldan beri turaqty túrde ótip keledi. Tuńǵysh dodada qandasymyz Eleýbek Qýanuly top jarsa, 2024 jyly bas júlde Shattyq Órleýulyna tıeseli bolǵan edi.
Aıta keteıik, Almatyda 27 qyrkúıekte mereıtoılyq Almaty Marathon ótedi. Saıysqa 60-tan astam elden 16 myń qatysýshy qatysady.
