Qytaıdaǵy qandasymyz Italııada ótetin lıtsenzııalyq týrnırge qatysady
ASTANA. KAZINFORM – Bokstan Italııanyń Býsto-Arsıtsıo qalasynda ótetin lıtsenzııalyq týrnırge Qytaı ulttyq quramasynyń atynan qandasymyz Danabek Baıǵazy da qatysady.
Qytaılyq basylymdardyń málimetine súıensek, Danabek ulttyq quramanyń kapıtany retinde tańdalyp, joldamaǵa basty úmitker boksshylarynyń biri retinde attanǵan.
Qandasymyz qazirgi tańda Qytaıdyń ulttyq quramasynda asa aýyr salmaqta (+92 kg) synǵa túsip júr. Atalǵan týrnırde jalpy Qytaıdan 6 boksshy joldamaǵa talasady.
Aıta ketsek, ótken jyly Danabek Baıǵazy Tashkentte ótken álem chempıonatyna qatysyp, shırek fınalǵa deıin jetse, Hanchjoýda (Qytaı) ótken Jazǵy Azııa oıyndarynda joldamaǵa synyq súıem jetpeı súringen bolatyn. Naqtyraq aıtsaq, shırek fınalda ol Mońǵolııa atynan synǵa túsken Beknur Halıge qarsy judyryqtasyp, ony ekinshi raýndta úsh ret nokdaýnǵa túsirip, merziminen buryn jeńiske jetti. Ókinishke qaraı, jartylaı fınalda súrinip, joldamadan tys qalǵan edi. Hanchjoýda fınalǵa shyqqan boksshylarǵa ǵana Parıj olımpıadasynyń joldamasy buıyrǵan bolatyn.
Esesine bul synda taǵy bir qytaılyq qandasymyz Toqtarbek Tańatqan Azııa oıyndarynyń chempıony atanyp, joldamany da qanjyǵasyna baılady.
Eger, Italııada Danabek Baıǵazy joldamaǵa qol jetkizse, qytaı qazaqtary arasynan Olımpıadaǵa tuńǵysh ret eki qazaq boksshy qatar qatysatyn bolady.
