Qytaıdaǵy eń iri teńiz gaz ken ornynyń ekinshi kezeńi paıdalanýǵa berildi
ASTANA. KAZINFORM — Bul ken ornyndaǵy jyldyq gaz óndirý kólemi 4,5 mıllıard tekshe metrden asyp, jobalanǵan eń joǵary deńgeıge jetedi dep kútilip otyr, dep jazady Sınhýa.
Qytaıdyń ulttyq offshorlyq munaı korporatsııasy (CNOOC) sársenbi kúni Ońtústik Qytaı teńiziniń akvatorııasynda ornalasqan «Shenhaı-1» gaz ken orny jobasynyń ekinshi kezeńi paıdalanýǵa berilgenin habarlady. Bul oqıǵa eldegi eń iri teńiz gaz jobasynyń tolyq júzege asýyn bildiredi.
«Shenhaı-1» ken ornynyń geologııalyq qory 150 mıllıard tekshe metrden asady. Munda gaz óndirý 2021 jylǵy maýsym aıynda bastaldy, sol kezde jobanyń birinshi kezeńi iske qosylǵan bolatyn.
Ken ornynda óndirilgen tabıǵı gaz Sıangan arnaıy ákimshilik aýdanyna, Haınan aralyndaǵy Sanıa qalasyna jáne Gýandýn provıntsııasyndaǵy Chjýhaı qalasyna teńiz arqyly tasymaldanyp, eldiń negizgi ekonomıkalyq óńirlerin gazben qamtıdy jáne ulttyq gaz qubyr jelisine qosylady.
«Shenhaı-1» — Qytaıdaǵy eń kúrdeli tereń teńiz gaz jobasy sanalady. Joba el ishindegi teńiz qaırańynda buryn-sońdy kezdespegen eń joǵary temperatýra men qysym jaǵdaılarynda júzege asyrylǵan. Paıdalaný tereńdigi 1500 metrden asady, al eń tereń uńǵymalardyń tereńdigi — 5000 metrge deıin jetedi.
Joba menedjeri Lıý Kannyń aıtýynsha, bul jobany iske asyrý barysynda qurylǵan óndiristik ınfraqurylym men tehnologııalyq júıe bolashaqta teńiz munaı-gazyn keshendi túrde barlaýǵa jol ashyp, eldiń energetıkalyq qaýipsizdigin qamtamasyz etýde teńiz resýrstarynyń rólin arttyrýǵa kómektesedi.
Budan buryn Qytaı bıligi seısenbi kúni 3 qyrkúıekte Pekınde Japonǵa qarsy soǵysta jáne álemdik fashızmge qarsy soǵysta jeńiske jetýiniń 80 jyldyǵyna arnalǵan saltanatty jıyn, sonyń ishinde Tıananmen alańynda aýqymdy áskerı sherý ótkizetinin jarııalady.