Qytaıdaǵy elektromobılder satylymy 11,5 mln danaǵa jetýi múmkin
BEIJІŃ. KAZINFORM – Beıjińdegi Auto China 2024 18-shi halyqaralyq avtosalonynda 278 elektromobıl modeli usynyldy. Ótken jyly Qytaıda elektromobıl eksporty kúrt ósken. Bıyl eldegi jalpy kólik eksporty 5,5 mln danaǵa jetedi dep josparlanyp otyr.
Bıyl Beıjiń avtosalonynda 117 álemdik premera (onyń ishinde 30-y transulttyq kompanııalardyń álemdik tusaýkeseri) jáne 41 kontsept-kar modeli usynyldy. Kórmede sonymen qatar 278 elektromobıl úlgisi tanystyrylǵan.
Qytaı avtomobıl ónerkásibi qaýymdastyǵynyń (CAAM) málimetinshe, 2023 jyldyń sońyna qaraı Qytaı 4,91 mln kólik eksporttaǵan. Jappaı ósim ótken jyly 77,6%-ǵa ósip, 1,2 mln birlikten asqan jańa energetıkalyq kólik quraldary (NEVs) eksportynyń kúrt ósýine baılanysty boldy. Ótken jylmen salystyrǵanda taza elektr kólikteriniń eksporty 80,9%-ǵa, gıbrıdti kólikter eksporty – 47,8%-ǵa ósti.
Ótken jyly energetıkalyq kólikterdiń óndirisi men satylymy sáıkesinshe 9,58 mln jáne 9,49 mln danadan asyp, jyldyq esepteý boıynsha 35,8 paıyzǵa jáne 37,9 paıyzǵa ósti. NEV naryǵynyń úlesi 31,6% boldy.
CAAM málimetinshe, 2023 jyly Qytaıda avtomobıl óndirý jáne satý kólemi 30,16 mln (+11,6%) jáne 30,09 mln (+12%) birlik bolǵan. Boljamǵa sáıkes, Qytaıda NEV satylymy 2024 jyly 11,5 mln danaǵa, al jalpy kólik eksporty 5,5 mln danaǵa jetedi.
Beıjiń kólik salony Shunyi halyqaralyq kórme zalynda 4 mamyrǵa deıin jumys isteıdi. 25-26 sáýir kúnderi Auto China 2024 tek qytaılyq jáne sheteldik jýrnalıster úshin jumys isteıdi. Osy eki kún ishinde BAQ ókilderi úshin rekordtyq kórsetkish – 163 baspasóz konferentsııasy ótedi.
